Чилин тIебиатдин мужизатрихъни ажайибвилерихъ а кьил авач жеди. И сеферда чна Америкадин Аризона штатда авай адетдинбур тушир жуьредин чархарикай-тепейрикай ихтилатда. Итижлу делил ам я хьи, “Аризонадин лепе” тIвар акьалтнавай рагарин винел патан къатар-къатар хьайи нехишри а чкадин тежер хьтин кьетIенвал къалурзава. Аризонадин лепейриз мукьва мулкара инсанарни гзаф яшамиш жезва, гьавиляй анаг туристрин, шикилчийрин арада машгьур я.
Шикилдай аквазвайвал, ихтилат физвай чка лепеяр акьалтнавай къумадин кIунтIариз ухшар я. Бязи чешмейри кхьизвайвал, 250 миллион йис идалай вилик, гарарин хурук акатунин нетижада а чкада къумар кIватI хьана ва кIунтIар арадал атана.
Къенин юкъуз и тIебиатдин бених барбатI хьуникай гьукуматдин махсус бюроди хуьзва ва аниз гьар юкъуз къад инсандилай артух ахъайзавач. Ажайиб чка акун патал туристар къумлухдай са шумуд сятда яхдиз фин лазим жезва. Австралияда и жуьредин къванцин кIунтIар аватIани, къумадикай арадал атанвай Аризонадин лепедиз тешпигь чка дуьньяда мад санани авач.
«Лезги газет»
