2022-йисуз Москвада, “Редакционно-издательсткий дом “Российский писатель” АНО-да, жегьил шаир Владик Батманова яцIу жилдер алаз, 288 чиникай ибарат “Лекьрен муг” тIвар алай ктаб чапдай акъуднава. И карда адаз пулунин такьатралди Керимова Фируза Назимовнади куьмек ганва.
Ктаб лезги ва, Белоруссиядин шаир Анатолий Аврутина таржума авуна, урус чIаларал акъатнава.
Лезгидалди акъатнавай пай литературовед ва профессор Гьажи Гашарова Владик Батмановакай ва адан бажарагъдикай кхьенвай макъаладилай башламиш жезва.
Ктабдин урус чIалал акъатнавай паюниз “сифте гаф” Дагъустандин халкьдин шаир Мегьамед Агьмедова кхьенва.
“Лекьрен муг” ктаб “Зи гуьгъуьниз дуьазава дидеди”, “Гьар са цIарцIе руьгь ава зи”, “Вун галазни галачиз”, “Кьуд цIар — зи рикIин кIусар” кьилерикай ибарат я. Дидедиз бахшнавай шиирар В.Батмановахъ са шумуд ава. ИкI, шаирди кхьизва:
Сагъ тежер хер авазва хьи зи чанда,
Кьуьзуь жезвай диде акваз пашманда,
Ам амукьна кIан я кIвале, ватанда,
Гьайиф, гьайиф, къе зи диде кьуьзуь жез,
Адан чIулав, яргъи чIарар рехи жез…
Дидедикай хьиз, “Лекьрен муг” ктабда В.Батманова хайи чиликай, муьгьуьббатдикай, лезги халкь кьве патал пай хьуникай, алай аямда кьиле физвай рикIик къалабулух кутазвай са бязи крарикай кхьенвай шиирарни гьатнава.
Владик Батманован са шиирда ихьтин цIарарни ава:
Вучда закай и дуьньядал атана
Шиирралди рикIер чими тавурла?..
Чна жегьил шаирдиз цIийи ктаб акъатун мубаракзава ва адахъ мягькем сагъвал, яратмишунрин рекье мадни еке агалкьунар хьана кIанзава.
Хазран Кьасумов
