Мукьвара Дербент шегьердин къадим къеледин выставкайрин залда Википедияда лезги раздел кардик кутуна 10 йис тамам хьуниз талукьарнавай семинар кьиле фена. Ана лезги ва табасаран чIаларал акъатзавай газетрин, жемиятдин тешкилатрин векилри ва масабуру иштиракна.
Семинардал Лезги википедиядин администраторар тир Мурад Шихагьмедовни Олег Абарников рахана. Абурун гафарай малум хьайивал, интернетда лезги чIалал википедия 2012-йисан 27-мартдиз ахъайнай. Лезги разделда алай вахтунда 4307 макъала чапнава.
Кеферпатан Кавказдин чIаларин википедиядин иштиракчийрин дестедик, санлай къачурла, цIуд чIалан векилар ква. Абурун арада виридалайни вилик фенвайбур чечен (1-чка), осетин (2-чка) ва лезги чIаларин (3-чка) разделар я.
ГъвечIи халкьарин чIаларал кардик квай вики-проектра хьиз, Лезги чIалан википедиядани лингвистикадин, уьлкве чирдай ва милли маса темайри гзаф чка кьазва. Ина гьакIни спортдин, дуьньядин географиядин ва яшайишдин са жерге хилеризни чка гузва.
Проектдин зайиф патарихъай рахайтIа, иштиракчийрин ва бине авай макъалайрин кьадар тIимил я. М.Шихагьмедован гафарай малум хьайивал, Лезги википедиядин раздел официальнидаказ ачухдалди, ана бегьем чурун тавунвай 490 макъала авай. Раздел кардик акатайдалай кьулухъ са десте гадайрини рушари текстер урус чIалай лезги чIалаз элкъуьриз, хейлин макъалаяр гьазурна. Лезги википедия мягькемдиз кIвачел акъвазуник къуьн кутур авторрин арада Аслан Хасиев, Ильяс Букаров ва масабур ава. Алай вахтунда ана чапзавай макъалаяр Мурад Шихагьмедовани Олег Абарникова кхьизва. Къейд ийин хьи, википедиядин кар алай шартIарикай сад ам я хьи, ана чапзавай макъалаяр энциклопедиядинбур, маналубур ва википедияди тайинарнавай къайдайрал амал авуна гьазурнавайбур хьун герек я.
Википедиядин лезги разделда авай макъалайрикай эхиримжи йисуз кьудаз (Рим, Тихий океан, Португалия, Хиналугъдин чIал) хкягъай макъалайрин дережа ганва. Дербентдикай ва Кьасумхуьруькай кхьенвай макъалаяр лагьайтIа, “Хъсанди” дережадиз лайихлу хьанва.
Википедиядин лезги разделда авай макъалайрихъ галаз таниш жез кIанзавайбурувай интернетда “Iez.wikipedia.org” ссылкадикай менфят къачуз жеда.
Къагьриман Ибрагьимов
