И гафар чи сейли журналист Къурбаналийрин Камранан Бакуда цIийиз чапнавай “РикIин рехъ” ктабдай къачунвайбур я. И ктабда ада яргъал йисара кхьена, печатдин жуьреба-жуьре органра чапнавай очеркар, макъалаяр, репортажар, рекьерин къейдер, зарисовкаяр, интервьюяр, маса жанрайрин кхьинар гьатнава. Советрин гьукумат чкIайдалай кьулухъ, автор Азербайжанда акъатай лезги печатдин саки вири органрихъ (“КцIар”, “Самур”, “Алпан” газетар, “Чирагъ”, “Алам” журналар) галаз авсиятда хьанва.
Гьар са ктаб хьиз, и ктабни са кьиса, са мурад, са вакъиа я. Хайи чIалал акъатзавай гьар са газет, журнал, ктаб чIалан къуллугъда ава. Чар-чар, цIар-цIар тупIалай авуна за и ктаб. Чи халкьдин сейли ксарикай, шаиррикай, духтуррикай, алимрикай, спортсменрикай, генералрикай, манидаррикай, ашукьрикай, пагьливанрикай, сая инсанрикай, адетрикай, суваррикай.., са гафуналди, тамам энциклопедия хьиз я. ЧIалал, чилел, халкьдал, инсанрал рикI алай автордин руьгьдин кьакьанвили кIелзавайдан виле, кьиле, фагьумда экв твазва, фикириз тазва, вичин гаф лугьузва. Ктабдикай кIелдайбурун гегьенш къатаривай менфят къачуз жеда. Гьавиляй и кIватIалдин мас (къимет) чIехи я.
Ктаб “Зи акунар, зи кьатIунар”, “Жузун-качузунар”, “Аламдин рехъ”, “Акунринни кьатIунрин гуьгъ”, “Эпитафияр” тIварар алай паярикай ибарат я. Гьар са пай са ктаб я лугьуз жеда.
35 йис идалай вилик Бакуда университетра кIелзавай лезги студентри “Лезги шиирдинни манидин нянияр” туькIуьрдай. И мярекатар са иер адетдиз элкъвенай. КцIарай ансамблдизни, вузра тарсар гузвай алимриз, шаирризни эвер гудай. Зини Къурбаналийрин Камранан дуствал и мярекатар тешкилунин карда, лезги медениятдин “Самур” меркез арадал атайла, ана Дагъустандин халкьдин шаир Кичибег Мусаеван гьяддин юкъуз жедай мектебда мадни кIеви хьанай. Чун руьгьерин мукьвавили агуднай ва гьа чIавалай Камран муаллим зи эсеррин сифте кIелдайдини хьана. Шукур хьурай Аллагьдиз, чавай гьеле и дуствал хуьз хьанва, чи стхавал хизанрин, мукьвабурун дуствилиз, чирхчирар хьуниз элкъвенва.
Къурбаналийрин Камран Абдултагьиран хва 1971-йисан 11-апрелдиз Хачмаз райондин Ялама хуьре муаллимдин хизанда дидедиз хьана. Яламадин юкьван мектеб, гуьгъуьнлай яру дипломдалди Азербайжандин государстводин нафтIадин Академиядин энергетикадин факультет, Ростовдин госуниверситетдин юриствилин факультет акьалтIарна. Ада Бакуда “Самур”, “Алпан” газетра кIвалахна, “Алам” журналдин кьилин редактор хьана, журналдин редакцияда литературадин “Марвар” кIватIал арадал гъана. Исятда “Ютубда” “АЛАМ-ТВ” канал кардик кутуна, гьана кIвалах кьиле тухузва.
1994-йисара Камран муаллимди Бакуда лезги ктабрин кIвал (библиотека) арадал гъанай. А чIавуз лезги чIалал Азербайжанда ктабар кьит тирвиляй, Махачкъаладиз фена, чи играми шаир Фейзудин Нагъиевавай са еке чантада авай кьван ктабар гъанай. А ктабар Камран муаллимди гилани багьа аманатар хьиз хуьзма. Вуч хъсан я, Бакуда къе лезги чIалал ктабар, газетар, журналар чап жезва.
Заз Азербайжанда алай чIавуз чи чIал, тIал патал и инсанди кьван зегьмет, азият чIугур, чи медениятдин векилрин гъил кьур маса кас чидач. Лезги меденият, милли журналистика вилик тухунай 2014-йисуз ам “Шарвили” эпосдин премиядиз лайихлу хьана. Вичихъ мадни еке агалкьунар хьурай!
Заз гьар юкъуз ийизвай са дуьа, шукур хьайи Аллагьдивай тIалабзавай са кар ава. Чи дуьнья саламат хьурай, санани, садрани ягъ-ягъунар тахьурай, инсанди инсан кьин тавурай. Инсанрин кьилелай хумаяр, вирусар алатрай, рекьер ахъа хъхьурай. Са чIални текьирай, гьакIни чи чIални сагърай!
Эгер рекьер ахъа тиртIа, са чанта ацIай ктабарни гваз Дагъустандиз атана, хайибур рикIин кьилив агудна, анайни са чанта ацIай ктабар гваз элкъвена Чпирдал хкведай…
Эйваз Гуьлалийрин
