Диде-ватан хуьда лугьуз,
Гьазур хьайи жигитар.
Азад уьмуьр хьурай лугьуз,
Чанар гайи игитар.
Украинада кьиле тухузвай махсус серенжемда кьегьалвилелди телеф хьайибурукай сад Исрафилов Сайман Валентинович я. Ам 2000-йисан 6-декабрдиз Кьасумхуьрел дидедиз хьана. Са шумуд йис алатайла, адан хизан Тюмендин областдиз куьч хьана. Ина Саймана Сургутдин патарив гвай Солнечный тIвар алай поселокда 1-нумрадин мектебда кIелна. Хъсан къилихрин, рикIе мурадар авай, уьмуьрдал, спортдал рикI алай гадади мектеб къизилдин медалдалди акьалтIарна. Ватандин вилик кьегьалвилелди, викIегьвилелди вичин буржи кьилиз акъудай зирек хва Сайманаз кьейидалай кьулухъ “Жуьрэтлувиляй” орден ганва.
Дагъустандин хуьре хьанвай Сайман, дагъларин лекь хьиз, цIавуз экъечIна ва Солнечный поселокда, лугьун хьи, лув гуз хьана. Уьмуьр куьруьди хьанатIани, адан дережа кьакьанди я. Солнечный поселокда Исрафилов Сайманан тIварцIихъ азаддиз къуршахар кьунай акъажунар кьиле фена. Ибур сад лагьайбур я. Умуд кутазва хьи, игитдин тIварцIихъ галаз алакъалу акъажунар ва маса мярекатар гьар йисуз кьиле фида. Ихьтин хва хана, хвена чIехи авур адан буба Валентиназ ва диде Анжеладиз чухсагъул.
Мектебда кIелдайла, гадади общественный уьмуьрдикни вичин пай кутуна. Спортдин рекьяй лагьайтIа, ада жаванрин акъажунра иштиракна. Азаддиз кьуршахар кьунай грамотаяр, медалар къачуна. Мектеб акьалтIарайла, Сайман Москвадин военный училищедиз гьахьна ва яру диплом, лейтенантвилин чин къачуна. 2022-йисан сентябрдиз Сайман къуллугъ ийиз Калининград шегьердиз ракъурна. Анайни — Донбассдиз.
Жегьил Луганскдин республика азад ийидай гьерекатра игитвилелди телеф хьана. Адан 22 йис тир. Игит рухвайрин тIварар чи рикIера эбеди я.
Назифа Юркъулиева
