Лугьузвайвал, игитар яз хазвайди туш, игитар жезвайди я. Гьайиф къведай са кар ава: гзаф вахтара игитрин уьмуьр куьруьди жеда. Украинадин мулкарал женгинин махсус серенжемда вичин аскервилин буржи тамамардайла, игитвилелди телеф хьайи кьилдин зенитно-ракетный дивизиондин командир, “Жуьрэтлувиляй” ордендин сагьиб, сержант Арсен Амрулагьович Гьабибован хьиз…
Мукьвара Кьасумхуьруьн поселенидик акатзавай КIахцугърин хуьруьн юкьван школа Арсен Гьабибован тIварцIихъ ягъуниз талукьарнавай мярекат кьиле фена. Ана райондин кьил Саид Темирханова, райадминистрациядин кьилин 1-заместитель Лацис Оружева, райондин собранидин депутатри, рагьметлудан багърийри ва жавабдар маса ксари иштиракна.
Саид Темирханов Украинада кьиле физвай женгинин махсус серенжемдикай, ана 300-далай виниз чи райондин агьалийри иштиракзавайдакай, абуру къалурзавай кьегьалвилерикай гегьеншдиз лагьана.
Мярекатдал рахай райондин собранидин депутат Агьмедулагь Селимова, школадин директор Мавлуд Эскерова, муаллимри Арсенан лайихлувилер рикIел хкана, адан тIвар школадиз гун кIелзавайбуру, муаллимри, хуьруьнвийри дамахдай кар жедайди къейдна.
Амрулагь Гьабибова вичин хцин тIвар школадиз гунай райондин администрациядиз, собранидиз, хуьруьнвийриз, кьилди Саид Мусиновичаз чухсагъул лагьана.
РикIе тIал, вилерал накъвар алаз Арсенан диде Валентина Гьабибовади вичин хцин жаван йисар рикIел хкана, Арсенан женгинин юлдашрин ихтилатар бинеда кьуна, ам кьегьалвилелди гьикI телеф хьанатIа суьгьбетна. И суьгьбетди мярекатдин иштиракчийрин вилерал накъвар гъана.
С.Темирхановани А.Гьабибова школадин дараматдин цлал алкIурнавай рикIел хуьдай делилар алай кьулунилай перде алудна.
Хазран Кьасумов
