8-майдиз Мегьарамдхуьруьн райондин Советский хуьруьн паркуна ЧIехи Гъалибвилин 78 йис тамам хьуниз ва вичин къанажагълу уьмуьр халкь абад, хайи чил мублагь авунин кардиз бахшай, образованидин, хуьруьн майишатдин ва партийный кIвалахрал жавабдар къуллугъар тамамарай Ватандин ЧIехи дяведин ветеран, буршимакьави Абдулхаликьов Шамил Абдулхаликьовичан тIвар эбеди авуниз талукьарнавай мярекатар шад гьалара кьиле фена.
Ана райондин общественный палатадин председатель Агъададаш Нагъметуллаева, Советский хуьруьн кьил Эмирагъа Асварова, Дагъустандин халкьдин муаллим, зегьметдин ветеран Абубакар Нуралиева, хуьруьн мискIиндин имам Анвер Пашаева, РФ-дин лайихлу муаллим Мегьамед Къужаева, школадин директор Ренат Мегьамедгьуьсейнова, муаллимри, аялри, хуьруьн жемятди ва масабуру иштиракна.
Мярекат хуьруьн администрациядин цлал Шамил Абдулхаликьовичан тIвар эбеди ийизвай кьул ачухунилай гатIунна.
Эмирагъа Асварова вичин девирда Шамил Абдулхаликьова кутур паркуниз адан тIвар ганвайдакай малумарна.
Къагьриман Ибрагьимов
