20-декабрдиз Москвада миллетрин кIвале “Россиядин халкьар: надирвал, меслятвал, кьетIенвилер” Вирироссиядин конференция хьана. Анал Россиядин Федерациядин халкьарин дидед чIалар хуьнин, чирунин Фондунин патай дидед чIалар хуьнин сергьятра аваз виридалайни хъсан проектрай дипломар гана.
Абурун арада Дагъустандин “Джигит ТВ-дин” проектни ава. Чи ватанэгьли Эмран Гьуьсейнова арадал гъанвай канал официальнидаказ 2022-йисуз ачухун пландик кутунва. Алай вахтунда проектдин командади контент вич арадал гъунал кIвалахзава.
Шад жедай кар ам я хьи, Россиядин халкьарин дидед чIалар хуьн, чирун патал шартIар яратмишунин мураддалди Фондуни, и проектдин тереф хуьн яз, ам къейдна ва пулунин такьатар ахъайна. И фонд 2018-йисуз Россиядин Федерациядин Президентдин Указдалди арадал гъайиди я.
«Лезги газет»
