ЦIийи ктабар
Эминхуьряй тир бажарагълу ва тежрибалу журналист, писатель ва шаир Хазран Кьасумова вичин нубатдин 6 лагьай ктабдиз “ЗуькIуьд булах” тIвар гун дуьшуьшдин кар туш. И булах Х.Кьасумов дидедиз хьайи (1958-йисуз), гьакIни лезгийрин рикI алай шаир Етим Эминан ватан тир Ялцугърин хуьре ава. Къе дагъдин хуьре касни яшамиш жезвач. Амма булах ама!
Куьгьне хуьруьн юкьни-юкьвал,
Алай булах, гьикI я ви гьал?
Зун кьил чIугваз хтанва вал,
Ялцугъарин ЗуькIуьд булах.
Ширширдин ван хьайила ви,
РикI гьиссерив ацIана зи.
Вуч ширин я хайи ери?
Ялцугъарин ЗуькIуьд булах…
ЦIийи ктаб писатель, публицист Гьажи Ильясова кхьенвай (ам ктабдин редакторни я) “Автордикай куьруь гаф” макъаладилай — Хазран Кьасумован биографиядин къейдерилай башламиш жезва.
“ЗуькIуьд булах” ктабда Х.Кьасумован къелемдикай эхиримжи йисара хкатнавай шиирар гьатнава. ЧIехи пай шиирар са низ ва я са квез ятIани бахшнава. “ГьикI дамахдач СтIал Сулейманан райондал!” шиир 28 бендиникай ибарат я. Ана райондин хуьрерин, анрай акъатай машгьур ксарин, тарихдин метлеб авай ва тIебиатдин гуьзел чкайрин шикилар ганва.
Гзаф шиирар низ ва я квез бахшнавайбур ятIа, абурун тIварарай-кьилерай чир жезва: “Гьа Игит хва Радим я чи”, “Игит хцин диде я”, “Ялцугърин хуьр зи хайи тир макан я”, “Хьанай вун, Эмин!”, “Эминан хуьр”, “Зи Дагъустан”, “ЦIийи йисаз вегьезва за кам” ва масабур.
Къанни цIуд йисалай виниз я Хазран Кьасумова “Куьредин хабарар” газетдин редакцияда журналист яз кIвалахиз. Мегер адавай цIи вичин 90 йисан баркаллу юбилей къейд авур газетдиз бахшна шиир кхьин тавуна акъвазиз жедани! “Куьредин хабарар” кьил ганвай ам 20 бендиникай ибарат я:
Зи уьмуьрдин гьевес, девлет,
Ам “Куьредин хабарар” я.
Заз виридлай масан газет,
Ам “Куьредин хабарар” я…
“ЗуькIуьд булах” ктабда гьакIни СтIал Мислимата, Сажидин Саидгьасанова, Тегъи Мегьамедова чпин къелемдин дуст Хазран Кьасумоваз бахшна кхьенвай шиирарни гьатнава.
ЦIийи ктаб акъатун мубарак авуналди, чаз Хазран Кьасумовахъ кIвалахда ва яратмишунрин рекье мадни еке агалкьунар хьана кIанзава.
Асият Мирзалиева
