ФМБА-дин (Федеральное медико-биологическое агентство) иммунологиядин институтди, “МИР-19” (“Малая интерферирующая РНК”) тIвар алаз, коронавирусдикай сагъардай цIийи дарман акъуднава. Ам 22-декабрдиз РФ-дин здравоохраненидин министерстводи регистрация авунва. Идакай ФМБА-дин сайтда хабар гузва.
Дарман акъудайбуру къейдзавайвал, “МИР-19”-дивай коронавирусдин вири штаммрихъ, гьа гьисабдай яз “омикрондихъ” галаз женг чIугваз жезва. Ам гьеле алатай йисуз арадал гъанвай. Мукьвара акьалтIай эхиримжи ахтармишунри адан менфятлувал тестикьарна. ИкI, дарман ахтармишунрин сифтегьан пай 2021-январдиз, кьвед лагьайдини апрелдин эхирра кьиле тухвана.
Нетижайри субутзавайвал, алай вахтунда коронавирусдикай сагъарун патал кьиле тухузвай адетдин къайдадин терапиядин вилик “МИР-19” ишлемишуни сагъарунин менфятлувал хкажзава. Кьилинди, ам ишлемишиз регьятди я. Исятда ам анжах стационарра ишлемишзава. Гуьгъуьнлай ам адетдин ингаляторра ишлемишдай мумкинвални жеда.
«Лезги газет»
