Тlебиатда чаз ерли ван тахьай, такур, ажайиб гьайванар гзаф ава. ИкI, Кеферпатан Америкадин кьурагь чкайра яшамиш жезвай какомицли тlвар алай гъвечlи гьайванни ажайиббурукай я. Енотрин жинсиникай тир какомицли регьятдиз вердишариз жеда. Гьавиляй ам анин бязи агьалийри, шахтерри хуьзва. Абуру адал “шахтердин кац” лакlаб эцигна. Винел патан акунрай ам са тlимил цуцlулдиз ухшар я. Яргъивилел 30-47 сантиметр ала, тум бедендилай 2-3 сантиметрдин яргъи я.

И гъвечlи вагьшийри кьифер, къуьрер, гьашаратар ва маса затlар незва. Гагь-гагь къушар, чурчулар, гъуьлягъар ва хъиперни тlуьниз ишлемишда. Якlун тlуьнрилай гъейри, абуру набататарни незва: мегъвер, хурмаяр ва маса майваяр. Кьифер кьунин алакьунар авайвиляй абур бязи вахтара кlвалерани хуьзва.

Какомицли США-да, Мексикада ва Юкьван Аме­рикадани ава. Адет яз, абур дагълар, къванер авай, патав ядни гвай чкайра ва тамара яшамиш жезва. И гьайван илимдин рекьелди тlимил ахтармишнавайди яз гьисабзава. Какомицлидин душманар ти­пlерни машахар я. Тlебиатда абур 7 йисуз кьван яшамиш жезва.

Гьазурайди — Куругъли Ферзалиев