Ватандин ЧIехи дяведин йисара гзаф лезгийрикай Яру Армиядин офицерар хьана. Къе заз капитандин чиндиз лайихлу хьайи Аллагьвердиев Шагьламаз Шагьламазович рикIел хкиз кIанзава.
Шагьламаз 1921-йисуз Хив райондин АрхитIрин хуьре дидедиз хьана. 1939-йисуз Буйнакскдин финансрин ва экономикадин техникумдин 1-курс куьтягьай ада АрхитIрин хуьруьн къванцин цIивин акъуддай мядендин бухгалтервиле кIвалахиз башламишна.
1942-йисан февралдиз ам Ватан хуьз рекье гьатна. Политический училище куьтягьай адаз младщий лейтенантвилин чин гана. Кеферпатан Кавказдин фронтдин 9-армиядин гвардиядин стрелковый 9-бригададиз рекье тур ам командирдин заместителвиле тайинарна. Женгерик экечIай Шагьламаза душманрикай ватан азад авуник вичин пай кутуна, Керчь, Харьков, Крым, Одесса ва маса шегьерар азадна. Дяве Ш.Аллагьвердиева Гамбург шегьерда куьтягьна.
Дяведилай гуьгъуьниз Ш.Аллагьвердиева Хив райондин ЦIинитIрин хуьруьн школада муаллимвиле, ахпа силисчи яз Хив, Мегьарамдхуьруьн районрин прокуратурада кIвалахна. 1956-1959-йисара Шагьламаза КПСС-дин ЦК-дин къвалав гвай партийный школада кIелна. Партийный рекьяй чирвилер хкажай офицерди КПСС-дин Хив райкомда гьар жуьре къуллугъар тамамарна.
Шагьламаз Аллагьвердиев гзаф хъсан инсан тир. Адаз районда еке авторитет авай. Вичин везифаяр лап намуслувилелди кьиле тухузвай къуллугъчидиз са шумуд сеферда Дагъустандин обкомдин патай сагърай лагьана, гьуьрметдин грамотаяр гана.
Шагьламаз Шагьламазовичан хизанни чешнелуди тир. Адан хва Арсен Аллагьвердиев — Олимпиададин гимишдин медалдин иеси, кьве сеферда Европадин, са шумудра СССР-дин чемпион, лайихлу тренер республикадин дамах я.
Фашистрихъ галаз кьиле тухвай женгера къалурай кьегьалвилерай Ш.Аллагьвердиев Ватандин дяведин 1-дережадин ордендиз, “Кавказ хуьнай”, “Германиядал гъалиб хьунай” медалриз лайихлу хьана.
«Лезги газет»
