Сулейман-Стальский райондин образованидин идарайрин арада КВН-дин Юниор лигадин VI фестивалдин финалдин къугъун кьиле фена. Ам райондин администрациядин куьмекни галаз физический культурадин, спортдин ва жегьилрин крарай комитетди ва образованидин управлениди тешкилнавайди тир. Спонсорвилин куьмек райондин кьил Нариман Абдулмуталибова, “Рычал-су” заводди, “МУГ” гипермаркетди, “Кпул ятар” санаторийди, “Там-Там” ресторанди ва культурадинни машгъулатрин “Три-Стал” центради гана.
Финалдин къугъуна Кьасумхуьруьн ва Герейханован 1-нумрайрин, Кьулан СтIалрин, Шихидхуьруьн, Кьасумхуьруьн 2-нумрадин ва КIварчагърин школайрин командайри иштиракна. Абуру “Приветствие команд”, “Домашнее задание” ва “Музыкальный номер” номинацийрай акъажунар тухвана.
Нетижада “Кьулан СтIалрин асланар” командади (Кьулан СтIалрин СОШ) 1-чка кьуна. 2-чкайриз “КIеви кIерецар” (Шихидхуьруьн СОШ) ва “Герейханован неве–яр” (Герейханован 1-нумрадин СОШ) командаяр, 3-чкайризни “Алидхуьруьн кьегьалар” (Кьасумхуьруьн 2-нумрадин СОШ), “Кьасумхуьруьн лекьер” (Кьасумхуьруьн 1-нумрадин СОШ) ва “Къуччагъар” (КIварчагърин СОШ) командаяр лайихлу хьана.
КВН къугъуна тафаватлу хьайи Саида Гуьлмегьамедовадиз (Кьулан СтIалрин СОШ) ва Мегьамедсаид Шихкъаибоваз (Шихидхуьруьн СОШ) райондин кьил Нариман Абдулмуталибова планшетар гана.
РД-дин ЮТО-да алатай йисуз 1-чка кьур “Герейханован невеяр” командадив гъалибвилин сертификат ва 15 агъзур манатдин кьадарда аваз пулдин приз вахкана.
Хазран кьасумов
