1986-йисалай инихъ Сулейман-Стальский райондин ЦIийихуьруьн “Алёнушка” тIвар алай ясли-бахчадин заведующий Сейдалиева Светлана Нусретовна вичин пешедал ашукь ксарикай я. Алай аямдин шартIарив кьадайвал эцигнавай а ясли-бахча гьеле 1980-йисуз рагьметлу И.Гь.Тагьиров КПСС-дин Сулейман-Стальский райкомдин 1-секретарь тир вахтунда шад гьалара ачухна. Светлана Сейдалиевади къейд авурвал, чIехибурукай сад тир ясли-бахчадиз райондин кьилевайбуру еке фикир гузва.
Райондин бюджетдин такьатрин гьисабдай ясли-бахчадихъ 2-корпусни гилиг хъувуна, 2016-йисалай абур кардик ква.
Сифтедай 100 аялдиз тербия гузвай и ясли-бахчада алай вахтунда 255 аял тербияламишзава. Абурун къуллугъда 54 кас пешекарар, гьа жигьетдай яз 25 кас педагогар (абурукайни 10 касдихъ кьилин образование ава) акъвазнава. Заведующийди кьилин категория авай пешекаррин жергедай тербиячияр Гьажимурадова Тамиладин, Мегьамедханова Фазинадин, Гъаниева Индирадин, медсестра Шерифова Шуьшехалуман ва масабурун тIварар кьуна.
Ина кIвалах образовательный стандартрин бинедаллаз тешкилнава. 2 мертебадин дараматда вири жуьредин къулай шартIар тешкилнава. Аялар 8 группадиз чара авунва. — И кардин гьакъиндай чпин аялар ясли-бахчадиз кьабулун патал электронный учирда 300 кас акъвазуни шагьидвалзава, — къейдна С.Сейдалиевади. — Амма чахъ ахьтин мумкинвал авач. Арзайрин бинедаллаз, законрин истемишунрихъ галаз кьадайвал, чна сифте нубатда военный къуллугъчийрин, къайдаяр хуьдай органрин работникрин, 1 ва 2-группайрин инвалидрин аялар кьабулзава. Арзаяр РУО-да кьабулзава ва электронный учетда эцигзава.
БицIекри жуьреба-жуьре мярекатра активвилелди иштиракун инин музыкальный руководитель, машгьур чIагъанчи Загьир Мегьамедован ва тешкилатчи Мамлакат Мирзабеговадин чалишмишвилерин нетижа я.
КIвалахдин вири терефар фикирдиз къачурла, райондин ясли-бахчайрин арада “Алёнушка” 2-чкадал ала. 2017-йисуз районда кьиле фейи “Йисан тербиячи” конкурсда и ясли-бахчадин тербиячи Мегьамедханова Фазинади 2-чка кьуна.
Аялрин гьакъиндай еке жавабдарвал хиве авай Светлана Сейдалиева гьар пакамахъ, чина бахтлувилин нур аваз, кьвед лагьай кIвал хьанвай ясли-бахча галайвал къвез аквада. Адаз инин коллективда, бицIекрин ва абурун диде-бубайрин патайни еке гьуьрмет ава.
Светлана Нусретовнадин гзаф йисарин намуслу зегьмет “РД-дин умуми образованидин гьуьрметлу работник”, “РД-дин образованидин отличник”, “Зегьметдин ветеран” тIварар гуналди къейднава.
Абидин Камилов
