Бандикут

Бандикут нек хъвадай, руфуник чанта квай, Австралиядани ЦIийи Гвинея­да яшамиш жезвай гьайван я. Яргъи тIиш алай и гьайванар 140 граммдилай 2 килограммдал кьван заланвал авайбур жеда. Гзаф жуьреяр асул гьисабдай 1 килограммдин заланвал авайбур я. Тум шуькIуь, япар еке и гъвечIи вагьшийри рикI алаз гьашаратар, гагь-гагь набатат­рин дувулар, бебелукар неда. Бязи вахтара кьиферал, гъвечIи хурлинкIрал гьужумда. 

Бандикут асул гьисабдай вичин тIе­квенда йифен уьмуьр кьиле тухузвай гьайван я. Адак квай чанта кьулухъ ахъа жезва. Мад абурукай ихьтин делилар малум я:

• Вилериз хцидаказ аквазвачтIани, бандикутар хъсандиз ван къведай, ни къведай гьайванар я.
• И гьайванрин яргъивилел 20-50 сантиметр хьун мумкин я.
• Бандикутрин чIар хъуьтуьлди ва гзаф сигъди я, ранг — рагъулвални рехивал какахьайди. Руфуналлай чIар лацуди жеда.
• Кьулухъан тапасрал кьве еке тIуб ала.
• ТIебиатда бандикутрин душманар си­кIер, типIер, чIурун кацер, дингояр я.
• Бандикутар МСОП-дин (ТIебиатдин къаравулвал авунин вири халкьарин союз) ва Австралиядин Яру ктабдик кутунва.

«Лезги газет»