Чи ватанэгьлияр — гьар сана
За вичикай куьруь ихтилат ийизвай ватанэгьли, Саратовда яшамиш жезвай Расим Назирович Мегьамедов, рикIе халкьдин милливилиз талукь важиблу месэлаяр авай, абур гьялун патал алакьдайвал алахъунар ийизвай гъвечIи карчи я.
Ери-бине СтIал Сулейманан райондин Эминхуьряй тир Расим Мегьамедов 1988-йисан 13-июлдиз Туьркменистанда дидедиз хьана. Сад лагьай классдилай ада Саратов шегьердин мектебда кIелна. Мектеб куьтягьайдалай кьулухъ ам налогрин хилез талукь пешедай Саратовдин экономикадин университетдик экечIна.
Вуз акьалтIарайдалай кьулухъ ада зегьметдин рехъ сантехникадин материалрихъ галаз алакъалу гъвечIи тешкилатда кIвалахунилай башламишна. Алишверишдин жигьетдай тежриба хьайи ватанэгьлиди гуьгъуьнлай сантехникадин затIар маса гудай хсуси туьквен ачухна.
Алай вахтунда ада машгьур Wildberries маркетплейсда алишверишдин рекьяй кIвалахзава, гьа са вахтунда ам чIехи IT-тешкилатдин амадагни я. Расиман хизанда 4 веледдиз тербия гузва: 2 хцизни 2 рушаз.
«Саратовда лезги халкьдин еке тешкилат ава, чна арада мягькем дуствал хуьзва, мукьвал-мукьвал гуьруьшмиш жезва, медениятдин хилез талукь гъвечIи мярекатар тухузва. Ина чна алатай 2023-йисалай лезги чIалан тарсарни тешкилнава. Тарсар гузвай муаллимни ава, гила чаз и важиблу кардал кьвед лагьай муаллимни желб ийиз кIанзава. ГьакIни чун Саратовда «Каспий» проект кьилиз акъудунал, спортдин стадион еримлу авунал машгъул я», — лугьузва Расим Мегьамедова.
Ихтилатдилай кьулухъ за адавай хайи хуьруьхъ галаз алакъаяр хуьзвани лагьана хабар кьурла, ада алава хъувуна: «Авайвал лагьайтIа, хизандин къайгъуйри, кIвалахди мукьвал-мукьвал хуьруьз хъфидай мумкинвал къакъудзава. ГьакI ятIани, Кьиблепатан Дагъустандиз гагь-гагь хъфизва. Гележегда ватанда жуван хсуси кIвални эцигдай фикир ава захъ».
Къуй Расиман рикIе авай къени къастар вири кьилиз акъатрай!
Куругъли Ферзалиев
