Жирафрикай итижлу делилар

Садра акурла, рикIелай алат тийидай, вичин акунри гьейранардай, масабуруз ухшар тушир кьетIен гьайван я жираф. Ингье абурукай са бязи делилар. 

—           Гьайванрикай сив кьакьуниз тежезвайди анжах жираф я.

—           Виридалайни кьакьан и гьайвандин кьакьанвилел 4,5 метр ала. Бязи эркек жирафрин кьакьанвал 6 метрдивни агакьзава. Абурун заланвал 1,5 тонндилайни алатун мумкин я.

—           Жирафрин шарагар крчар алаз хазва.

—           Бязи пешекарри тестикьарзавайвал, жирафдин тIвар араб чIалан “Zarafa” (“йигиндиз къекъведайди” лагьай чIал жезва) гафуникай арадал атанва.

—           Жирафдин иви гзаф икьиди я.

—           Алимри жирафрин 9 жуьре аваз гьисабзава.

—           Вагьшийрилай чIехи жирафрал гьужум ийиз алакьзавач. Адет яз, асланри, лекьенри ва маса йиртижийри жегьил, лап кьуьзуь ва азарлу жирафрал гьужумда.

—           Жирафдин рикIин заланвал 10 килограмм я.

—           И гьайванар са акьван юзун квачирбур хьиз аквада­тIани, герек атайла, абурулай йигиндаказ чукуриз алакьзава. Месела, са сятда абурувай 55 километрдин мензил атIуз жеда.

—           И гьайванрин хам гзаф кIе­ви я, гьавиляй абуруз хирер-кьацIар хьунихъай кичIе туш.

­—           Жирафар 25 йисуз кьван яшамиш жезва­.

—           Незвай пешерин кьеж бес жезвайвиляй и гьайванривай са шумуд гьафтеда яд хъун тавуна дурум гуз жеда. Гьа са вахтунда жирафдивай са сеферда 38 литр кьван яд хъваз жеда.

—           Жирафдин мез чIулав рангунинди, 45 сантиметр кьван яргъивал алайди я.

—           Абурун рикI алай тIуьн акациядин пешер я.

—           Жирафрин “багъри” окапи лугьудай гьайван я.

«Лезги газет»