Дарманрин набататар
Дагъустанда экъечIзавай дармандин набататрикай сад декурквачI я. Алим Къ.Акимован лезги чIаланни урус чIалан гафарганда къалурнавайвал, декурквачI урус чIалал алтей я. Бязи нугъатра адаз джилахти лугьузва. Шаир М.Бабаханован лезги чIаланни урус чIалан гафаргандини гьа и жуьреда тестикьарзава.
ДекурквачI жегьре рангунин цуьквер ахъайдай, тан 150 сантиметр кьван кьакьан жедай набатат я. Чи вилаятда, Юкьван Азияда экъечIзавай и набатат июндизни июлдиз цуькведа жеда. Гзафни-гзаф абур вацIар, вирер авай дерейра, кьеж квай чуьллера, уьленлухра, кул-кусрин арайра гьалтда.
“Мукалтин” тIвар алай дарман декурквачIдин миже кваз арадал гъизва. Набатат ва адан дувул полисахаридралди, хийирлу маса ягълуйралди девлетлу я.
И набатат сифтедай “алцея” (грек чIала “сагъар хъийидай” мана ава) тIварцIелди машгьур тир. Адакай лап къадим девиррани менфят къачузвай.
ДекурквачIдикай нефесдин ва тIуьрди иливардай органар тIазвайла, хийир къачузва. И набатат циз вегьена гьазурнавай дарманди уьгьуьярни явашарзава. Ратарин, хуквадин азарар авайбурувайни, куьмек гудай такьат хьиз, декурквачIдин дувул ишлемишиз жеда.
Набатат ишлемишдай, адакай дармандин такьатар арадал гъидай къайдаяр анжах пешекарривай чирун важиблу я.
«Лезги газет»
