Ахцегьай 35 километрдиз кьван винелди дагъларихъ фейила, Фиярин хуьр гьалтда. Ам инсанвал, мугьманпересвал, дуствал гьамиша вине кьадай дирибаш рухвайралди, зегьметдал рикI алай малдарралди, ашукьралди, манидарралди, духтурралди (ва икI мад) фадлай машгьур я. Гила ингье и гуьзел макандин бажарагълу ксарин сан мадни артух тирди къалурзавай писатель, шаир, вични полковник Нисрет Сейфуллагьович Исмаилов майдандиз экъечIнава, ада чи вилик нубатдин “Илиф, дустар” ктаб гъанва. Вичин диде-бубадин руьгьдиз, вири фийивийриз бахшнавай и ктабда хайи ерийрикай пара чими келимаяр лагьанва, ам “девлетрин дагъ”, “устадрин чад”, “ашукьрин къул”, “серкеррин хуьр”, “манийрин чан”, “эркек рухвайрин ватан”, “гъейратрин тур”, “тарихрин гъен”, “гьуьрметрин син”… тирди къалурнава.
18-июндиз Махачкъалада цIийи ктабдихъ галаз танишарзавай мярекат кьиле фена. “Кувшин” ресторандин залдиз теклифнавай ксар ашукь Ширинан “Фиярин хуьр” ва маса манийрин хуш сесерик кваз гьахьзавай.
Мярекат ачухай ва кьиле тухвай гьуьрметлу Идаят Насирова ктабдихъ ва адан автордихъ галаз танишарна, полковникдин уьмуьрдин рекьикай куьрелди суьгьбетна. Ктаб мубаракиз, нафузлу, еке авторитет авай гзаф ксар рахана.
Виридан тIварар кьадай мумкинвал авач (багъишламишрай), кьилди къачуртIа, Зияд Седрединова, Булу Умудалиева, Физавудин Шагьпазова, Гьасангьуьсейн Абдулжалилова, Тарлан Мамедова, Къафар Ризаева, автордин стхайри, ярар-дустари, и цIарарин авторди ва гзаф масабуру Нисрет Сейфуллагьовичан дуьзгуьнвал, къенивал, бажарагълувал къейдна. Абурукай бязибуру лагьай “лувар квай” хьтин ибараяр инал гъун кутугнава: “хъсандиз къени рикI, девлетлу руьгь авайда кхьида”, “бажарагълуди вири крара бажарагълу я”, “савадлу, кар бажармишдай, гзаф дустар авай кас я, адаз вирида гьуьрметзава, чи государство ихьтин дирибаш рухвайрихъ муьгьтеж я”; “лезги халкьдиз гьа ихьтин рухваяр герекзава”, “ахьтин ксар ава хьи, гьар юкъуз са гьихьтин ятIани хъсан кардин гуьгъуьна жедай. Эркек хва я. Адаз хайи ерияр, ярар-дустар гзаф кIанда. РикIе берекат авай и кас чи намус, чи дамах я. Нисрет Сейфуллагьовичан рикI дуьнья хьиз ачух я”…
Рахунрин арайра генерал Танкаеван тIварунихъ галай фондунин председатель Гь.Абдулжалилова Нисрет Исмаиловав РД-дин ветеранрин Советдин патай ганвай “Жегьилар ватанпересвилин руьгьдаллаз тербияламишунай” медаль, са жерге маса ксарив генерал Танкаеван тIварунихъ галай знакар вахкана. КIватI хьанвайбур Тарлан Мамедова, ашукьар тир Айдуна, Къафлана, Самира шадарна.
Ш. Шихмурадов
