Чурчул мванза

Чилел яшамиш жезвай жуьреба-жуьре чурчулрин арада «агама мванза» тIвар алайди иллаки фикир желбдайди я. Руфун галчIуриз къекъведай гьайванрин арада и чурчулар сифте нубатда хамунин рангунин кьетIенвилелди тафаватлу жезва. Эркек мванзайрин кьил, гардан ва къуьнер къати яру ва я фичIи рангунинбур жеда, беден – мичIи вили. Адет яз, и жуьредин диши агамаяр шуьтруь рангунинбур жеда. Адетдин агамайрин рангни шуьтруьди я. Муькуьбурулай тафаватлу яз, и чурчулдин тум гзаф яргъи жеда. Мванзаяр лужаралди, дестейралди яшамиш жезвай гъвечIи гьайванар я. Еке хьанвай мванзадин яргъивал 35 сантиметрдив агакьзава.

Мванзаяр къумлухдиз ухшар чкайра яшамиш жезва. Алай вахтунда абур Африкадин Танзанияда, Руандада ва Кенияда гьалтзава. Итижлу делил ам я хьи, эгер и чурчулдик бегьем кичI кутуртIа, адан бедендин ранг дегиш жеда. Яни и гьайвандин ранг, адан гуьгьуьлдилай аслу яз, дегиш хьун мумкин я. ЦицIер, куквар ва шарар мванзайри рикI алаз незвай ем я.

«Лезги газет»