Чи ватанэгьлияр — гьар сана
Спортдин лап кьакьан кукIушар муьтIуьгъарнавай Радик Исаев неинки лезгийрин, гьакI маса халкьарин арадани фадлай машгьур я. Спортдин рекье къазанмишнавай вини дережадин агалкьунрикай рахадайла, эвелни-эвел Радика 2016-йисан гатуз Бразилиядин Рио-де-Жанейро шегьерда кьиле фейи олимпиададин къугъунра къазанмишай къизилдин медаль рикIел хкун кутугнава. Заланвилин тайин дережада ада вичелай зурба тхэквондист дуьньядал алачирди успатна.
Радик (Абдурагьим) Велединович Исаеван ери-бине Шарвилидин магьалдай, такабурлу Ахцегь райондин Ухулрин хуьряй я. Ина ам 1989-йисан 26-сентябрдиз дидедиз хьана. Спортдиз ада аял чIавалай майилвалзавай. Мектебда кIелай йисара спортдин са шумуд жуьреда вичин алакьунар синагъна. Эхирни тхэквондодал рикI ацукьна.
2014-йисуз ада 87 килограммдал кьван заланвал авайбурун арада тхэквондодай Европадин чемпионатда къизилдин медаль къачуна. Адалай вилик, 2013-йисуз, ам дуьньядин чемпионатда кишпирдин медалдиз лайихлу хьана. Тхэквондодай 2015-йисуз ада дуьньядин чемпионатдани, гьа и йисуз Европадин I лагьай къугъунрани чемпионвилин тIвар къачуна. 2017-йисуз кьиле фейи Исламдин къугъунрани адакай гъалибчи хьана.
Къейдна кIанда, тIвар-ван авай пагьливан Азербайжанда яшамиш жезвайвиляй ада 2012-йисалай и уьлкведин патай иштиракзава. Амма виликдай ам Россиядин сергьятра спортдал машгъул жезвай, 2010-2011-йисара адакай галаз-галаз Россиядин Кубокдин сагьибни хьана. Са вахтара ада Дагъустандин женгерин искусствойрин госцентрадин патай акъажунра иштиракзавай. Тхэквондодин рекьяй ада иштиракнавай кьван кесерлу акъажунрикай ва анра къазанмишнавай агалкьунрикай галай-галайвал кхьейтIа, ихтилат яргъиди жеда.
Спортда чIехи агалкьунар къазанмишунай, Европадин къугъунра гъалибвал къачунай ва Азербайжанда спорт вилик тухуник лайихлу пай кутунай ам “Баркаллувал” ордендиз, 2015-йисуз “Азербайжандин лап хъсан спортсмен”, “Спортдин лайихлу мастер” тIварариз лайихлу хьана. 2016-йисан 1-сентябрдиз Азербайжандин президент И.Алиеван къарардалди адав “Ватандиз къуллугъ авунай I лагьай дережадин” орден вахкана.
Буйдин кьакьанвилел 2 метрни 5 сантиметр алай зурба пагьливанди вичихъ хьанвай вири агалкьунар аял чIавалай спортдал машгъул хьунин, сагълам уьмуьр хкягъунин, вилик тайин макьсадар эцигунин ва абур бажармишунин карда зегьмет чIугунин нетижа яз гьисабзава. Къуй чи ватанэгьлидихъ гьамиша анжах гъалибвилер хьурай!
«Лезги газет»
