Рагар-Алачухар

Чил ажайиб чкайралди, тIебиатдин аламатралди гзаф девлетлу я. Акунри гьейранардай чкайрикай сад Америкадин Нью-Мексико штатда гьуьлуьн дережадилай 1730-1950 метр кьакьанда авай Каша-Катуве тIвар алай рагар я. 2001-йисуз анаг США-дин президентди милли монументрин жергедик кутуна.

Рагарин патав инсанар гьакъидихъ ахъайзава. Йифен вахтунда аниз фин къадагъа я. Са бязи чешмейрин делилралди, ихьтин ажайиб дагълар-алачухар янардагъдин (вулкан) руьхъведикай 7 миллион йис кьван идалай вилик арадал атана.

Официальный тIвар Каша-Катуве (чкадин чIалай таржума авурла, “Лацу рагар” лагьай чIал жезва) ятIани, чпин акунриз килигна, абурал “Рагар-Алачухар” тIвар акьалтнава. КукIвал кIвенкI алай, туристрин алачухриз ухшар кIунтIарин кьакьанвал 30 метр кьван я.

«Лезги газет»