Окапи

Шикилдай аквазвай гьайван окапи я. Ам Африкадин Конго уьлкведа яшамиш жезва. Винел патан акунрай ам балкIандиз, жирафдиз ухшар я. Гьакъикъатда ам вилик девирдин жирафрин жинсерикай яз гьисабзава. Гардандин, кIвачерин яргъивилини ам жирафдин “багърийрикай” тирди тестикьарзава. Гьелбетда, жирафдин гардан, кIвачер окапидинбурулай хейлин яргъи я.

Алай вахтунда тIебиатда окапияр гьикьван аватIа тайиндаказ малум туш, амма тахминан 35 агъзурдалай 50 агъзурдал кьван аваз хьун мумкин яз гьисабзава. Дуьньядин зоопаркра абур 160 ава. Абур яру тав квай мичIи шуьтруь рангунинбур жеда. КIвачер зебрадин хьтин, маргъвар авайбур,  кьилни чIулаввални лацувал какахьай рангаринбур я. Эркек окапийрал кьве куьруь карч жеда. Гьайвандин заланвал 250 килограммдиз кьван барабар жеда, яргъивал —  2,1 метрдиз.

Жирафрин хьиз, окапийрин тIуьнни тарарин пешерикай ибарат я. Вичин яргъи мецивди окапиди тарарин бертер кьада ва адал алай вири пешер михьда. Абуру векьни, емишарни, къарникъузарни, къижиярни неда. Адет яз, и гьайванар кьилди-кьилди яшамиш жеда, амма гагь-гагь дуьшуьшра абуру гапIаларни теш­килда. Окапияр 30 йисуз кьван яшамиш жезва.

«Лезги газет»