Баклан
Дуьньядин гзаф чкайра, гьа жергедай яз Россиядани яшамиш жезвай бакланар гьуьлуьн къушарик акатзава. Асул гьисабдай абуру гьуьлуьн къерехра, островра, вацIаринни вирерин патарив уьмуьр кьиле тухуда.
Бакландин бедендин екевал уьрдегдив ва я къазрав гекъигиз жеда. И къушарин асул ем балугъар, пахлаханар ва маса гьашаратар я. Островда яшамиш жезвай бакланри хъипер, цин гьашаратар, гьуьлуьн гъуьлягъар ва хъалхъас хъипер неда. Са юкъуз еке бакланди 600 грамм кьван балугъар незва. ТIуьрди иливарунин гьерекат хъсанарун патал гагь-гагь абуру гъвечIи къванер туькьуьнда.
Итижлу делилрикай сад ам я хьи, Китайда, Японияда ва Египетда бакланрин куьмекдалди балугъар кьунин адет ава. Вердишарнавай бакланрихъ яргъи къайтанар гилигзава ва, адет яз, йифен береда, чирагърин экуьнин куьмекдалди, луьткведилай абур циз ахъайзава. Кьур балугъ бакландивай туькьуьниз тахьун патал адан гарданда еке тушир гьалкъа твазва. Амма лап хъсандиз вердишарнавай бакланри гьатта гьалкъа галачизни кьур балугъар вичин иесидиз хкизва. Къейд ийин, и къушаривай балугъ жагъурун патал цин саки 60 метрдин дериндиз гьахьиз жезва. Це абуру саки 60 секундда эхда.
Бакланрин куьмекдалди балугъар кьун алай вахтунда машгьур туш: асул гьисабдай и кар туристар патал са машгъулат яз гьисабзава.
ТIебиатда и къушар 6 йисуз кьван яшамиш жезва.
«Лезги газет»
