Алатай йисуз Да­гъус­тандин мектебра кIел­завай аялар Россиядин Банкуни финансрин рекьяй савадлу хьун патал кьиле тухузвай онлайн-тарсариз 309 агъзур сеферда килигна. И кьадардал гьал­тайла, республика уьлкведа кьвед лагьай чкадал ала.

«Россиядин Банку­нин онлайн-тарсара ак­­­тив­­вал неинки рес­пуб­ликадин школай­ра кIел­завай аялри, гьакI колледжрин сту­дентрини­ къалурна — финсавадлувиляй семинарриз абур 27 агъзур сеферда килигна. 2022-йисан делилрив гекъигайла, им 1,5 сеферда гзаф я.  Аялри онлайн-тарсариз ийизвай итиж  якъинди я ва ам йисалай-суз анжах артух жезва», — лугьузва Россиядин Банкунин Дагъустанда авай Отделенидин  регьбер  Светлана Бацынади.

Алай йисан гатфарин сессиядин онлайн-тарсар башламиш хьанва ва 19-апрелдалди давам жеда. 8-11-классра кIелзавай аялриз ва колледжрин студентриз 24 темадин арадай хкядай мумкинвал ава. Финансрин рекьяй савадлувилин месэладилай гъейри, сессиядик пеше хкягъуниз талукь месэлаярни кутунва. Тарсар Россиядин Банкунин, уьл­кведин чIехи банкарин къуллугъчийри, вузрин муаллимри, базардин экономикадин  пешекарри тухузва.  Гьакъикъи вахтуна (прямой эфир) онлайн-къайдада кьиле тухузвай тарсара абуру чпин чирвилер ачухарзава ва иштиракчийрин суалриз жавабар гузва.

Вебинаррик гьам санлай са классдивай, дестедивай, гьамни кьилдин касдивай экечIиз жезва.  Тарсар тешкилзавай вахтуниз ва абурук экечIдай къайдадиз талукь делилар проектдин сайтдай (www.pensionfg.ru) жагъида.

Чи мухбир