МВД-дин хроникадай
Махачкъаладин полицейскийри чарадан эменни тергунай шак фенвай агьали кьуна, хабар гузва РД-дин МВД-дин пресс-къуллугъди.
Шегьердин полициядин Кировский отделдиз арза гваз 49 йисан яшда авай махачкъалави дишегьли (ички квай затIар маса гузвай туьквендин администратор) атана. Адан гафаралди, пиян гьалда авай са жегьил дишегьлиди, туьквендиз гьахьна, 60 агъзур манатдин къимет авай ичкидин суьрсет авай шуьшеяр къастуналди хана.
Полицейскияр агьвалат арадал атай чкадал фена ва 29 йисан яшда авай, гьал пайгардик квачир руш отделдиз хкана. Вич дуьздаказ тухун тийизвай рушавай полициядин къуллугъчийрин суалриз жавабар гуз хьанач.
Гуьгъуьнлай арзачиди ихтилатайвал, пиян муьштериди, тIвар кьунвай туьквенда аваз, дишегьлидиз кьве сеферда хуртIар гана. Администратордиз туьнт муьштери акъвазариз кIанзавай, амма хьанач. Нетижада туьквендиз гьахьдай ракни хкудна, ички авай са шумуд путулкани хана.
И делилдай суд-дуван авун патал материал кIватIнава.
Чи мухбир
