Гад тамамвилелди вичин ихтиярда гьатнава. Им чуьлдин кIвалах­рин виридалайни къизгъин вахтарикай сад я. Багъларани уьзуьмлухра, саларани производстводин маса хилера агротехникадин серенжемар кьиле тухунихъ галаз санал, алай вахтунда хуьруьн майишатдин карханайрин, лежбервилин майишатрин ва арендаторрин вилик гад агудунин везифани акъваз­нава.

— Бубайрин мисалда лугьузвайвал, гад гьарай я, ам вахтунда ва пучвилер авачиз агудунни лазим я, — лугьузва Сулейман-Стальский райондин хуьруьн майишатдин ва суьрсетдин управленидин начальникдин заместитель Гьамидин Абдулкъафарова. — Важиблу и кампаниядиз чун виликамаз вири патарихъай гьазур хьана, гад агудунин кIвалахарни тешкиллувал аваз кьиле физва.

Лагьана кIанда, хуьруьн майишатдин амай хилер хьиз, районда магьсулдарвилин хел вилик тухунизни кьилин фикир гузва. Нетижада районда техилар цазвай майданар ва кIватI хъийизвай бегьердин кьадар йисалай-суз артух жезва. ИкI, районда 2016-йисуз 5330 тонн, 2017-йисуз 5602,6 тонн техил кIватI хъувуна.

И йикъара чун гад агудзавай са шумуд карханадиз ва арендадин участокриз фена. Райондин хуь­руьн­ майишатдин ва суьрсетдин уп­равленидин начальникдин заместитель Гьамидин Абдулкъафаров ва Герейханован хуьруьн администрациядин кьил Рус­лан Алдыровни галаз чун Герейханован хуьруьн кьилихъ галай паласада арендатор Гьажибег Велибегован участокда ава. Кьезил шагьвардал лепе гузвай къуьлуьн никIер, гад агудунал машгъул тир механизаторарни лежберар акурла, гуьгьуьл шад жезва.

— Чи хуьруьн мулкуна магьсулдарвилин хиле вад кас арендаторри кIвалахзава, санлай къачурла, абурун кIвачихъ 60 гектар къуьлуьн­ни мухан никIер гала, — лугьузва Руслан Алдырова­. — Гележегда чахъ магьсулар цаз­вай майданар 150 гектардив агакьардай фикир ава.

Паласадин яд тагузвай никIе­рин гьар са гектардай 20-25 центнер техил жезва. Гуьгъуьналлаз пресс-подборщикар галай тракторралди самарикай туьквер кьазва, гьар са туьк 40 манатдай гьа чкадал маса гузва.

— Санлай къачурла, алай йисуз районда 2200 гектардай къуьл, мух ва нехв кIватI хъувун лазим я, — да­вамарзава ихтилат Гьамидин Абдулкъафарова. — Къенин юкъуз гад агудунал 6 комбайн машгъул я. Са тIимил йикъарилай и кардал, къунши районрай гъана, мад 4-5 комбайн желб хъийида.

Виридалайни гзаф майданра техилар Кьулан СтIалрин хуьруьн мулкара цанва — 399 гектарда. Кьилди къачуртIа, техи­лар­ 205 гектарда “Горец” ООО-да, 100 гектарда “Зардиян” ООО-да, 60 гектарда “Гайвазов Р.М.” КФХ-да, 25 гектарда “Ар­сен” КФХ-да цанва. Амай майданар арендаторрал ацалтзава.

Амай хуьрерикай рахайтIа, Курхуьрел 221 гектарда, Ви­ни СтIал­дал 160 гектарда, ЦIийи Макьарал 15 гектарда, Герейханован хуьре 60 гектарда, КIварчагъа 45 гектарда, Агъа СтIалдал 252 гектарда, Кьасумхуьрел 40 гектарда техилар цанва.

Райондин хуьруьн майишатдин карханайра, КФХ-ра ва арендадин участокра икьван чIавалди 650 гектардай гад агуднава. И кар давамни жезва.

Квез къуватар хьурай, халкьдин суфра берекатлу ийизвай магьсулдарар!

Хазран Кьасумов