Республикадин майишатра алафар гьазурунин  кIвалах худда кьиле физва, хабар гузва РД-дин хуьруьн майишатдин ва недай суьрсетдин министерстводин пресс-къуллугъди.

Къенин йикъан делилралди,  624,3 агъзур тонн векъи алафар гьазурнава, им  алатай йисан гьа и девирдин делилрив гекъигайла, 16,1 агъзур тонндин гзаф я.

Кьилди къачуртIа, хабар гузвайвал, 592,3 агъзур тонн векьер, 17,5 агъзур тонн сенаж, 17,5 агъзур тонн са­мар ва 1100 тонн силос  гьазур я. Виридалайни гзаф кьадар  алафар Къизляр райондин  аграрийрихъ хьанва — 86,1 агъзур тонн (гьа жергедай яз, векьер — 69,7 агъзур тонн, сенаж — 13, 3 агъзур тонн ва самар — 3,1 агъзур тонн).

Майваяр 6,9 агъзур гектардин майданрай  кIватI хъувунва. Са гектардин бегьерлувал 453,7 центнердиз барабар яз, кIватIнавай майвайрин санлай къачур кьадарди 313,8 агъзур тонн тешкилнава.  2,5 агъзур гектардин чиляй 49,8 агъзур тонн картуфар, 4 агъзур гектардин  багъларай   22,3 агъзур тонн  емишар кIватIнава.

Майвайрин виридалайни еке бегьер  — 3,4 агъзур гектардай 206,3 агъзур тонн — Дербент райондихъ хьанва­.

Емишар кIватIунин карда лагьайтIа, кIвенкIвечи Мегьарамдхуьруьн район я. Ина 763 гектардин майдандай  5,8 агъзур тонн  емишрин бегьер вахчунва.

Чи мухбир