Алай йисан 26-апрелдиз залум ажалди садлагьана чи арадай вафалу дуст, хъсан къилихдин инсан, хуьруьн жемятдин сагъламвилихъ гелкъвезвай Агиф духтур акъудна.
Алиханов Агиф Сейфуллагьович 1968-йисан 26-январдиз Къурушрин хуьре дидедиз хьана. 1985-йисуз Къурушрин хуьруьн юкьван школа къизилдин медалдалди акъалтlарна. 1985-1986-йисара хуьре авай “Акташ” племптицефабрикада электриквиле кlвалахна. 1986-1988 йисара Советрин Армиядин жергейра къуллугъна. 1988-1994-йисара Дагъустандин госмединститутда кlелна.
Гуьгъуьнлай хайи хуьруьз хтана халкьдин сагъламвилин къаравулда акъвазна. Жемятдин арада рикlин сидкьидай кlвалахзавай Агиф Сейфуллагьович, халкьди райондин собранидин депутатвилени хкянай.
Агиф духтур рагьметдиз финикди ярар-дустари, мукьва-кьилийри залан дерт чlугвазва. Адан экуь къамат чи рикlера гьамишалугъ яз амукьда.
Чна Парвана дидедиз, Бесханум вахаз, Алиханаз ва вири хизанриз, мукьва-кьилийриз рикlин сидкьидай башсагълугъвал гузва.
Агиф духтурдин экуь къаматдиз бахшзава:
Гуьлуьшан тир гатфар йикъар,
Агакьна чав чlулав хабар.
Кьил куьрсарна ярар-дустар.
Мукьва-кьилид гатазва хур
Кьена лугьуз Агиф духтур.
Бес вучиз икl залум ажал,
Атана вун бирдан завал?
Чи рикlера туна на тlал.
Халкь паталди зегьмет чlугур,
Вуч фад кьена Агиф духтур
Ингилисдин векил хьиз вун,
Хъфидайла сагърай талгьун.
Вучиз вуна къарсурна чун?
Туьхвена са экв гудай нур.
Вуч фад кьена, Агиф духтур
Аллагьди ваз гана мерд ният,
Михьи руьгьни ачух суфат,
Чи рикlева экуь къамат.
Гьич са касдин тахай хатур,
Вун чи рикIе ама, духтур!
Неби Къурушви
