Хайи чIалан къул хуьз…

Алай йис Къурушрин хуьруьн уьмуьр­да лишанлуди я. Сад лагьайди, къурушвияр Хасавюрт райондин дуьзенлухриз куьч хьайидалай кьулухъ 70 йис алатнава, кьвед лагьайди, Да­гъус­танда мад са хуьруьхъни авачир Къурушрин хуьруьн “Къурушрин сес” тIвар алай газет акъатиз 15 йис я.

1968-йисуз зегьметкеш халкьдик руьгь кутун, абуру зегьметда  къалурзавай гьунарар раиж авун патал къурушвийри “Зегьметдин пайдах” газет арадал гъанай. Адаз сифте Нариман Къарибова, гуьгъуьнлай Ибрагьим Мурадова регьбервал ганай. Перестройкадин “алакьунрин” нетижада къурушвийрин машгьур совхозни чукIурна, гьадахъ галаз “Зегьметдин пайдах” газетдин кIвалахни акъваз хьана.

2007-йисуз “Зегьметдин пайдах” газетдин чкадал “Къурушрин сес” газет арадал хкана. И кардиз талукь теклиф сифтени-сифте бажарагълу шаир Лезги Арифа ганай. Адан тереф Лезги писателрин союздин Къурушдал кардик квай отделенидин вири членри хвенай.

Хуьре цIийи газет акъудзавайдакай хабар хьайила, “Яру  Дагъ” фирмадин генеральный директор Нурали Мегьмандарова сад лагьай нумра чап авуниз акъатзавай харжияр вичин хивез къачунай. Гуьгъуьнлай, адалай чешне къачуна, и кардик Неби Мирзоева, Ва­къиф­ Диярханова, Забит Сардаровани чпин пай кутуна. Абуру чара авур пулдин такьатрихъ агъзур экземплярдин тираж аваз газетдин са шумуд нумра чапдай акъатна. 2008-йисан январдин вацралай газет подпискадилай жезвай къазанжийрихъ акъудиз эгечIна.

ЦIийиз арадал хканвай газет къурушвийри хушдиз кьабулна, адан тиражни йисалай-суз артух жезвай. Газет кхьизвайбурун жергейра неинки са Къурушрин, гьакIни къурушвияр яшамиш жезвай Дагъустандин маса хуьрер, шегьерар авай. Мисал яз, газет Москвада, Санкт-Петербургда, Нижний Новгородда, Астраханда, Нижневартовскда, Азербайжанда, Украинада авай къурушвийри кIелзавай.

2009-йисуз “Къурушрин сес” газетдин  кьилин редактор Лезги Ариф садлагьана чи арадай акъатна. Адан вези­фаяр жегьил шаир, адан хва Муса Агьмедован хиве гьатна. Гьелбетда, ам са акьван регьят кар тушир. Ингье Муса Агь­медова вичи а вахт гьикI рикIел хкиз­ватIа: “Дугъриданни, а вахт зун паталди четинди хьана. Ихьтин жавабдарвал хиве гьатуни зун еке имтигьанра тунай. Амма жувахъ рикI кузвай багъ­­рийри, бубадини жуван ярар-дустари заз а имтигьанрай экъечIиз еке куьмекар ганай. Иллаки, газетдин кIвалах­дикай рахай­тIа, а чIавуз Гьажи Къазиеванни Мегьамед Ибрагьимован чалишмишвилер лап тафаватлубур хьанай. Идалайни гъейри, редколлегиядин гьар са членди чпелай алакьдайвал кIва­лах вилик финик пай кутаз алахънай. Абурун арадай яз Шагьназар Хидирован, Сабир Эфендиеван, Шихали Багъирован, Сайидали Сулейманован, Кьасум Фаталиеван, Демир Гьажиметован, Сулудин Гьафизован, Къумри Дуьгуьшеван, Вердихан Къулиеван ва масабурун тIварар кьаз жеда.

Къейд авун лазим я, “Лезги газетдин” кьилин редактордин заместитель Куругъли Ферзалиевани чи газет гьазурунин карда куьмекар гана. Газетда чапзавай макъалайрикай рахайтIа, абурун тематика жуьреба-жуьре я. Мисал яз, хуьруьн тарихдикай са шумуд нумрада Рамазан Къулиеван “Чил” тIвар алай гегьенш ма­къала чапнай. Ам кIел­за­вай­буру хушдиз кьабулна. Газетда датIана диндин алим Ямин Мегьамедова кхьизвай Исламдин макъалаярни чапзава.

Газет арадал гъуник гьам пулдин такьатралди, гьамни макъалаяр кхьиналди, подписка тешилуналди пай кутур ва кутазвай, амма чна макъалада тIварар кьун тавунвай ксаривай чна бейкеф тахьун тIалабзава. Абурукай гьар сада кутунвай пай (тIимил-гзаф талгьана) 15 йисан къене акъатай кьван нумрайрай аквазва. Алай вахтунда газет акъудуниз чпин хсуси такьатар чара ийизвай Гьажиев Рашид Сейфиевичан ва Рамазанов Гьуьсейн Несрединовичан тIварар кьилди кьун кутугнаваз аквазва. Сагърай газет хуьз алахънавай вири ксар!”.

2015-йисан 1-августдиз Ахцегьа    16-сеферда кьиле фейи лезгийрин “Шарвили” эпосдин мярекатдал суварин орг­­комитетдин председатель, гьа йиса­ра Дербент шегьердин мэр Имам Яралиева культурадин, спортдин, яша­йиш­дин маса хилера чIехи агалкьунар къазанмишай са жерге ватанэгьлийрив, тешкилатрин коллективрив эпосдин премияр вахканай. Абурун арада “Къурушрин сес” газетдин редакциядин кол­лективни авай.

Ингье, акваз-такваз, къурушвийрин газет акъатиз 15 йис тамам­ хьанва. Гьар са газетдин даяхрикай сад ти­раж я. Амма ри­кIелай ракъурна кIан­дач, “Къурушрин сес” газетдиз гьукуматдин патай куьмек авайди туш, газет подпискадилай жезвай ва къаюмвал ийиз­вай ксари чара ийизвай такьатрихъ акъудзава.

Гьажи Къазиев

* * *

“Лезги газетдин” редакциядин коллективди “Къурушрин сес” газетдин редакциядин коллективдиз 15 йисан юбилей рикIин сидкьидай мубаракзава. И йисара гьихьтин имтигьанар, четинвилер хьанатIани, къурушвийри газетдин рехъ акъвазарнач, ам давамарна ва и кар къенин юкъузни чешне­лудаказ тамамарзава. Са шакни алачиз, им редакциядин коллективдин, газетдин амадагрин, ам кхьизвайбурун, кIелза­вайбурун умуми агалкьун я.

Чи мурад къелемдин дустарихъ, лезги чIал хуьник вичин пайни кутазвай “Къурушрин сес” газетдин редакциядин коллективдихъ чандин сагъвал, мадни чIехи агалкьунар, цIийи гъалибвилер хьун я.

«ЛГ»