Тапаррин аксина яракь
РФ-дин Президент В.Путина малумарайвал, мягькем чирвилер, жуван ватан кIан хьун, адахъ инанмишвал авун россиявияр патал гьамиша тапаррин, къалп хабаррин аксина кьилин яракь жеда.
Кремлдин пресс-къуллугъди хабар ганвайвал, идакай уьлкведин регьберди Россиядин “Знание” тешкилатдин 75 йис тамам хьунихъ галаз алакъалу яз рахай вахтунда ихтилатна. Адан гафаралди, тIвар кьунвай тешкилатди государство еримлу хьуник еке пай кутазва. “Знание” тешкилатди кьиле тухвай кIвалахрин хилерикай сад улу-бубайрин гьакъиндай гьахълу делилрин, тарихдин метлеб авай месэлайрин, чи игитрин, исятдани Ватан патал женг чIугвазвай кьегьалрин тереф хуьн я.
Тергна
13-декабрдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 343 самолет ва 183 вертолет, зенитный ракетайрин 396 комплекс, пилот галачиз лув гудай 2655 аппарат, 7087 танк ва дяведин маса машинар, РСЗО-дин 930 машин, артиллериядин ва маса 3684 яракь, военный махсус 7582 автомашин тергна.
Кесерлу яз амукьда
Германиядин канцлер О.Шольца малумарнавайвал, Украинадихъ галаз авай къалмакъал куьтягь хьайидалай кьулухъ Россиядихъ галаз экономикадин жигьетдай алакъалувилелди кIвалахунин кар гуьнгуьна хтун мумкин кар я. Адан гафар “Новости” РИА-ди раижнава.
Амма исятда ада алакъаяр гуьнгуьна хтуникай фикирзавач, акси яз, чи уьлкведиз малумарзавай санкцияр мадни артухардайвал я. Гьа са вахтунда ада Россия Европадин континентда виридалайни чIехи, кесерлу уьлкве яз амукьда лагьана.
Самолетарни гимияр агудзава
Тайвандин яракьлу къуватри островдин мукьув Китайдин армиядин 29 самолет ва пуд гими агатнавайдакай малумарнава. Идакай “Новости” РИА-ди хабар гузва.
Къейдзавайвал, 21 самолет островдин ПВО-дивай тайинариз хьанвай сергьятра ава. Тайванди гьалар гуьзчивилик кутун патал гьавадинни гьуьлуьн патруль рекье тунва ва ракетайрин комплексар дуьзмишнава.
Тайвандихъ галаз алакъалу гьалар аниз августдиз США-дин векил Нэнси Пелоси фейидалай кьулухъ къизгъин хьана. Остров чпин са вилаят яз гьисабзавай Китайдин терефдиз Пелоси аниз фин чуьруьк акъатунин эвел кьил хьиз акуна. Гуьгъуьнлай Китайди военный рекьяй гегьенш вердишвилер кьиле тухвана.
Еке мажибар авай регионар
Россияда виридалайни еке мажибар Чукоткада, ЯНАО-да, Москвада, Магадандин областда ва НАО-да ава. “Известия” чешмеди хабар гузвайвал, и делилар “Индекс социального благополучия регионов” фондуни кьиле тухванвай ахтармишунрал асаслу я.
Къуллугъчийри еке мажибар къачузвай 10 региондик Санкт-Петербургни, Мурманскдин областни, Якутияни акатзава.
Газ артухарун тIалабзава
Украинадин президент В.Зеленскийди G7-дак квай уьлквейрин регьберривай Украинадиз агакьарзавай газдин кьадар артухарун тIалабнава. Идакай “ТАСС” чешмеди хабар гузва.
Ада къейднавайвал, электростанцийрихъ галаз алакъалу четинвилери газ гзаф ишлемишуниз мажбурзава. Гьавиляй уьлкведа газдин игьтияж арадал атанва. Адан гафаралди, ихтилат алава яз маса къахчуна кIанзавай 2 миллиард кубометр газдикай физва.
Венгрия хкудуниз эвер гана
Украинадин верховный рададин международный крарин рекьяй комитетдин кьил А.Мережкоди, эгер альянсдин рейсадвилин тереф хуьн тавуртIа, Венгрия НАТО-дикай хкудуниз эвер гана. И гафар ада “Newsweek” чешмедиз гайи интервьюда лагьана.
Депутатдин фикирдалди, гележегда НАТО-дик Австралия, Япония, Кьиблепатан Корея ва Тайвань акатун мумкин я.
Идалай вилик Венгрияди НАТО-дин уьлквейриз Россиядихъ галаз авай алакъайрин рекьер хуьниз эвер ганай.
Алакъада ава
РФ-дин Президентдин пресс-секретарь Д.Пескова къейд авурвал, Владимир Путин ва Си Цзиньпин датIана алакъада ава, рахунар давамаруниз гьазур жезва.
Кредит агакьна
Украинадив Франциядин патай кьезил шартIаралди 100 миллион евро кредит яз агакьна. Украинадин министррин кабинетдин сайтда чапнавай малумат “Новости” РИА-ди раижнава.
Къейднавайвал, такьатар эвелни-эвел чарасуз тир яшайишдин, гуманитарный рекьериз харжун патал госбюджетдин умуми фондуниз ракъурнава. Алай йисан 24-февралдилай Францияди Украинадиз пулунин жигьетдай авунвай куьмек 432 миллион доллардив агакьнава.
«Лезги газет»
