Алай вахтунда Украинада кьиле тухузвай дяведин махсус серенжемда Хасавюрт райондин Къурушрин хуьруьн вад вишев агакьна кьегьалрини тафаватлудаказ иштиракзава, жуьрэтлувални викIегьвал къалурзава. Донбассдин агьалияр гзаф дарвиле, къулайсузвиле авайвиляй Россиядин регионрихъ галаз санал Дагъустандини мергьяматлувилин куьмекар гузва.

Майдин вацра Дагъустандин муфтиятдин къарардалди Хасавюрт райондай, кьиле Къурушрин хуьруьн имам Панагьов Азим гьажи аваз, Сулевкент хуьруьн имам Маликов Жамалудин гьажи ва «Къуруш-ТВ»-дин оператор Аливердиев Бешир гьажи Луганск­диз фена. Имам Азим гьажиди, хтайла, заз Лу­ганскда кьиле тухвай кIвалахрикай суьгьбетна.

— Чи везифа Луганскдин агьалийриз руьгьдин, ахлакьдин, яшайишдин, марифатдин рекьерай куьмекар гун тир. И кардин патахъай Дагъустандинни Луганскдин муфтиятрин арада икьрар кутIуннава. Гьавиляй аниз гьар вацра Дагъустандин­ шегьеррайни хуьрерай имамар рекье твазва. Чун ЛНР-дин Муфтий Гамбаров Мугьам­мад-Исмаил гьажиди шаддаказ кьабулна­. Чун Брянка лугьудай шегьердиз фена, кьиле мискIиндин имам Фаниль-Гьазрет аваз, ана жемятдихъ галаз еке межлис тухвана. Чна агьалийриз «Ассалам» газет­ар пайна. ДНР-дин муфтиятдин кьил Мугьаммад-Исмаил гьажиди Дагъустандин Муфтий Агьмад эфенди Абдуллаеваз сагърай лагьана. Ровеньки шегьерда чна, кьиле Мугьаммад-Исмаил гьажи аваз, Ватандин ЧIехи дяведа телеф хьайибур рикIел хкунин лишан яз, еке мавлид гана, Къуръандай сураяр кIелна, гуьмбетрал цуьквер эцигна.

Гьа ихьтин мярекатар мад Брянскда, Стахановда, Антрацитда, Арчеевскда, Луганскда, Красный Лучда тешкилна. Гьиниз чун фенатIани, виринра чун сивел шадвилин хъвер ва вилерал накъвар алаз къаршиламишна. Гьа икI, чун вири общинайрин имамрихъ галаз гуьруьшмиш хьана, виринра чна инай тухванвай чарасуз тир недай суьрсет (гъуьр, дуьгуь, чIахар, шекер, макаронар, ягълуяр ва маса шейэр) пайна.

Чун дагъустанвийрикай ибарат «Кас­пий»­ батальондизни фена, ана чун лап шаддаказ къаршиламишна. Абурузни савкьатар пайна. Чал ана къуллугъзавай чи хуьруьнви Бахишев Ризванни гьалтна.

Эхиримжи юкъуз Алчеевск шегьердин­ патав гвай яд кIватIдай гьамбарханадал чун фейи вири шегьеррин ва хуьрерин имамар галаз еке мавлид авуна. Сулевкент хуьруьн имам Маликов Жамалудин гьажиди Къуръан­дай сураяр, чи баркаллу рухваяр сагъ-саламатдиз чпин хизанрин патав хтурай лагьана, дуьаяр кIелна.  Луганскдин Муфтиятди инай фенвай виридаз чухса­гъулдин чарар ва савкьатар гана. Чпелай виридалай Аллагь рази хьурай.

Заз мярекатар видеокамерадиз къа­чур «Къуруш-ТВ»-дин оператор Аливердиев Бе­­шир  гьажидиз  чухсагъул  лугьуз  кIан­за­ва­­.

Гьажи  Къазиев