Спортдин жуьрейрикай дуьньяда виридалайни футбол машгьур яз гьисабзава. Сир туш, неинки дуьньядин, гьакI уьлквейрин, шегьеррин, хуьрерин, магьлейрин дережайрани жаванрин арада датIана футболдай акъажунар тешкилзава. Аялри, жегьилри футболдиз ийизвай итиж къвердавай артух жезва. Амма акъажунра иштиракдай, чпин алакьунар къалурдай мумкинвилер вирибурухъ жезвач. Бязи вахтара алакьунар авайбур хъендикни кумукьзава. Спортдин маса хилера хьиз, инани къаюмвалдайбур, пулдин такьатар чара ийидайбур герек жезва…
Амма Хасавюрт райондин ЦIийи Къурушрин хуьруьн “Къуруш” тIвар алай футболдин команда бахтлубурукай я. И командадиз РД-дин “Хатасуз Дагъустан” ГКУ-дин директор Вакъиф Сабирович Диярханова къаюмвалзава. Ада хайи хуьруьн жегьилрин арада спортдин и жуьре вилик тухуник, гьакъикъатдани, къимет авачир пай кутазва. Гьелбетда, футболдал къугъвазвай жегьилрини къаюмвалзавайда чпик кутазвай умудар гьакъикъатдиз элкъуьрзава.
ИкI, 25 футболистдикай ибарат “Къуруш” командади алай йисуз къугъунин рекьяй чпин тежриба, вердишвилер ва зирингвилер артух хьанвайди са шумудра субутна.
7-ноябрдиз “Анжи Арена” майдандал кьиле фейи къугъуна “Къуруш” командади чеб “Спортинг” командадилай викIегь тирди къалурна. Нетижада (3-турдилай кьулухъ) къурушвийрин команда турнирдин таблицада 3-чкадал хкаж хьана. Гьайиф хьи, 21-ноябрдиз “Къуруш” команда “Дубкидиз” 3:4 гьисабдалди кумукьна. И къугъунилай кьулухъ “Къуруш” команда турнирдин таблицада 6-чкадал ала. Амма акъажунар, имтигьанар гьеле вилик кума…
Тренер Загьир Рагьимован алахъунар себеб яз, команда алай йисуз Дагъустандин ЛФЛ-дин (гьевескарвилин футболдин лига) сад лагьай лигадиз акъатна. Къейд ийин, командади ЛФЛ-да иштиракиз цIи 4 — йис я.
Инал футболистрин тIварар кьилди-кьилди кьун кутугнава: Адигуьзелов Абдулагь, Алиев Марат, Алиев Ренат, Аликберов Гьасан, Алисултанов Насир, Булуев Рамазан, Жаватов Давуд, Дуьгуьшев Алибег, Исмаилов Мадрид, Керимов Юсуф, Къурбангьажиев Ашурлав, Лазимов Расул, Мегьамедов Али, Мамаев Гьажимурад, Мамедшагьов Давид, Мисриханов Микаил, Нурагьмедов Вакъиф, Салманов Салман, Сатиев Агьмед, Шагьбазов Амир, Шагьвеледов Ибрагьим, Шагьвеледов Гьабиб, Шерифов Мусаиб, Элимгьажиев Ибрагьим, Юсупов Омар.
“Къуруш” командади чпин тIвар турнирдин таблицадин вини кукIушдиз хкажунин макьсад вилик эцигнава. Къуй абурухъ гележегда анжах гъалибвилер хьурай!
Лезги Фетгьуьллагь
