Дагъустан халкьарин дуствилин адетралди девлетлу макан я. Асирралди Дагъларин уьлкведин халкьар арада дуствал, гьуьрмет-хатур аваз яшамиш хьана. Къецепатан душманрикай хайи чил хуьдай чIавуз абурун садвал генани мягькем жезвай. И кар тарихдиз вил вегьейлани якъиндиз аквазва. Чи йикъарани республикадин миллетрин арада стхавилин, дуствилин, амадагвилин, хванахвавилин алакъаяр, рафтарвилер давам жезва. Мукьвара Сулейман-Стальский районда Дагъустандин писателрин Союздин председатель, республикадин халкьдин шаир, вичин ери-бине Гуниб райондин Гонода хуьряй тир Мегьамед Агьмедован 65 йис тамам хьуниз талукьарна кьиле тухвай эдебиятдин межлисди и кар нубатдин сеферда субутзава.
Мярекатда Кьиблепатан Дагъустандин жуьреба-жуьре районрайни шегьеррай, Махачкъаладай атанвай мугьманри, эдебиятдин, медениятдин векилри, милли шииратдал рикI алайбуру иштиракна. Абурун арада Сулейман-Стальский райондин кьил Нариман Абдулмуталибов, Дагъустандин халкьдин шаирар — Мегьамед Агьмедов, Майрудин Бабаханов, филологиядин илимрин докторар — Фейзудин Нагъиев, Мегьамед Мегьамедов, “Лезги газетдин” кьилин редактор Мегьамед Ибрагьимов, Урусатдин писателрин Союздин членар Алигьажи Мегьамедов, Гьамзат Изудинов, Дагъустандин писателрин Союздин лезги секциядин председатель Владик Батманов, шаирар Сажидин, Мамед Халилов ва масабур авай.
Райондин культурадин отделди гьазурнавай и мярекат отделдин начальник Майрудин Бабаханова ачухна. Межлисдин иштиракчияр тебрикуналди, ада гаф Нариман Абдулмуталибоваз гана.
XX асирдин Гомердин ватанда яшамиш жезвай вири жемятдин тIварунихъай 65 йисан юбилей мубарак авуналди, Нариман Абдулмуталибова Мегьамед Агьмедован яратмишунрин алемдин кьетIенвилер, чIалан фасагьатвал, Дагъустандин эдебиятда ада кьунвай чка, шаирдин къилихдин ерияр къейдна. “Гзаф миллетрикай ибарат Дагъустандин халкьдин кьетIенвилерикай сад дуствилиз, бубайрин адетриз, ягь-намусдиз вафалу хьун я. Куь эсеррай кIелза-вайдаз инсанвал, шииратдин философия аквазва, абуру гьар садан бейнида эдебдин, ахлакьдин ерийрал чан гъизва. Куьне уьлкведин дережада аваз кьиле физвай гзаф мярекатра Дагъустан раижзава, хайи чIаларал кхьизвай жегьил шаирриз куьмекар гузва. ЧIехи шаир СтIал Сулейманан тIварунихъ галай райондихъ галаз куьне фадлай дуствилин алакъаяр хуьзва, ина кьиле физвай гзаф кьадар мярекатра иштиракзава. Вири и крарай за Квез мад сеферда сагърай лугьузва”, — алава хъувуна Н.Абдулмуталибова.
Гуьгъуьнлай ада юбилярдив са кьадар савкьатарни вахкана. Абурун арада чуьнгуьрни авай.
Мегьамед Агьмедован уьмуьрдикай гегьенш суьгьбет райондин образованидин управленидин ИМЦ-дин директордин заместитель Венера Абдуселимовади авуна.
Шаирдин яратмишунрикай чпин фикирар Мегьамед Ибрагьимова, Мегьамед Мегьамедова, Фейзудин Нагъиева, Алигьажи Мегьамедова, Мамед Халилова, Сажидина, Гьамзат Изудинова, Владик Батманова ва масабуру лагьана.
Межлисдин сергьятра аваз Сулейман-Стальский райондин аялрин яратмишунрин кIвалин тербиячийри лезги, авар, урус чIаларал Мегьамед Агьмедован шиирар кIелна.
Эхирдай юбилярди вичиз ихьтин гьуьрмет авунай, СтIал Сулейманан ватанда вичин юбилей къейд авунай межлисдин тешкилатчийриз сагърай лагьана.
Агьмед Магьмудов
