Украинадин  кьилевайбуру  жуьреба-жуьре  рекьерикай  менфят  къачуз,  Урусатдин ­регионра агьалийрин арада гъулгъула твазвайдакай чна виликдай хабар ганай. Мисал яз, уьлкведа малумарнавай тамам тушир мобилизациядиз акси яз мукьвара Махачкъалада кьиле фейи митингдин тешкилатчийрин кьулухъ Украинадин ­махсус къуллугъар акъвазнавайди тайин­ хьана. Нацистри гьам интернетда, гьамни жемиятдин гегьенш къатара чпин кьацIай гьерекатар кьиле тухун давамарзава.

И йикъара къанун-къайда хуьдай ор­ганрин векилри Дагъустандин меркезда военный комиссириатдин дараматдик цIай кутаз кIан хьунай шак физвай итим кьуна. РД-дин ФСБ-дин управленидин пресс-къуллугъдал асаслу яз, ТАСС-ди хабар гуз­вайвал, ам и кар авуниз Украинадин мах­сус къуллугъри мажбурзавай.

Кьунвайдан гафаралди, адан хци икьрардин бинедаллаз уьлкведин Яракьлу къуватра къуллугъиз кьве йис хьанва. Эхиримжи варцара ам махсус серенжем кьиле­ физвай мулкара авай. Хци бубадихъ галаз 2-октябрдалди алакъа хуьзвай. Адалай кьулухъ ада бубадиз мад зенг хъувунач.

Гуьгъуьнлай бубадиз вичин хва есирда гьатнавайдакай хабар гана. Хциз инадар кьада (гъилер, кIвачер галудда) лугьуз, къурхуяр гуз, Украинадин махсус къуллугъри дагъустанвидивай комиссариатдин дараматдик цIай кутун истемишзавай.

Алай вахтунда республикадин къанун-къайда хуьдай органрин векилри и дуь­шуьш­дин гьакъиндай ахтармишунар кьиле тухузва.

Чи мухбир