Алай вахтунда Дагъустанда догазификациядин программада иштиракун патал 3630 агьалиди арзаяр вуганва 12-октябрдиз кьиле фейи “Российская энергетическая неделя” форумдин сергьятра аваз РФ-дин Президент Владимир Путина уьлкведин Гьукуматдиз догазификациядин программа давамарунин гьа–къиндай тапшуругъ гана.
“Мукьвал тир девирда Гьукуматди “Газпромдихъ” галаз санал медицинадин идарайрин — поликлиникайрин, духтурханайрин, ФАП-рин — жигьетдайни гьа ихьтин къарар кьабулун хъсан кар жедай”, — ла-гьана В.Путина, вичи виликдай газификациядин программадик мектебарни кутун патал тапшуругъ гайиди къейд авуналди.
Дагъустандин энергетикадин ва тарифрин министр Ризван Мурадован гафаралди, республикада догазификациядин программадик 5,5 агъзурдалай виниз кIвалер кутадай мумкинвал ава. Къенин юкъуз тIвар кьунвай программада иштиракун патал 3630 дагъустанвиди арзаяр вуганва, абурукай 3031 — кьабулнава, 599 — элкъуьр хъувунва. Программадин сергьятра аваз 700-лай виниз кIвалерин патарив газдин турбаяр тухванва.
Министрди къейдзавайвал, чилин участокриз ва кIвалериз талукь документар къайдадик квачирвиляй, гзаф дуьшуьшра арзайрин бинедаллаз агьалийрихъ галаз икьрарар кутIуниз четин жезва.
“Программа давамарунин нетижада агьалийриз кIвалерин ва я чилин участокрин гьакъиндай иесивилин ихтиярар туькIуьрдай ва догазификацияда иштиракдай мумкинвал жеда. Яшайишдин рекьяй кар алай и месэлади халкьдин дуланажагъдин ери хъсанариз, республика газдалди таъминарунин инфраструктура вилик тухуз, экономикадин хилез инвестицияр желб ийиз куьмекда”, — лагьана Р.Мурадова.
РикIел хкин, догазификациядин программадин куьмекдалди государстводин гьисабдай тир пулдин такьатрихъ газ авай чкайра (хуьрера, шегьерра) агьалийрин чилин участокрин сергьятрив кьван газдин турбаяр тухузва.
Программада иштиракун патал агъадихъ галай рекьерикай менфят къачуна, арза гьазуриз жеда: “Госуслуги” порталдин куьмекдалди, МФЦ-да, https://connectgas.ru сайтда ва я газораспределительный карханадин сайтда арза гузвайдан хсуси кабинетда.
Агьмед Магьмудов
