Какахьай единоборствойрай бягьсер тешкилунал машгъул тир спортдин тешкилатдин (UFC) кьил Дана Уайта мукьвара кьиле тухвай пресс-конференциядал Гьабиб Нурмегьамедова мад са бягьс кьиле тухун мумкин тирдакай инанмишвилелди лагьана.
— Гьабиб бягьсиниз экъечIда. За фикирзавайвал, 30: 0 рекорд эцигунин мураддалди ам спортдивай гьелелиг къерех жедач. Гьабиба допинг-тестар вахкузва. Эгер бягьсер кьиле тухузвачтIа, и кар вуч патал ийизва? За ам спорт гадар тавуниз мажбурзавач. Исятда адавай вахт багърийрихъ галаз акъудиз ва фикириз жеда. Чна тади къачузвач, — алава хъувуна ада.
РикIел хкин: алай йисан 24-октябрдиз америкави Жастин Гэтжидихъ галаз кьиле фейи бягьсина гъалибвал къазанмишайдалай кьулухъ Гьабиб Нурмегьамедова спортдин рехъ акьалтIарнавайдакай (29 сеферда гъалибвал къазанмишна ва садрани кумукьнач) малумарнай.
«Лезги газет»
