Хайи ерияр машгьурзавай ксарин жергедай тир Эльдар Мурадханович Рагьимханован ери-бине Ахцегь райондин Мичегьрин хуьряй я. Ам 1975-йисуз Авадан хуьре дидедиз хьана. Алай вахтунда ам вичин хизанни галаз Ханты-Мансийск шегьерда яшамиш жезва. Спортдин рекье адахъ еке агалкьунар ава… Чебни — спортдин са шумуд жуьредай.
Чаз малум хьайивал, Э.Рагьимханов армейский къайдада гъилералди кукIунай Приволжско-Уральский округдин чемпион, гъилералди кукIунай Россиядин ФСИН-дин чемпион, международный турниррин гъалибчи, Уральский федеральный округдин (УрФО), Ханты-Мансийский автономный округдин (ХМАО) чемпионатрин са шумуд сеферда гъалибчи, Россиядин спортдин мастер я.
Чи ватандашди вичин къуватар кикбоксингдайни ахтармишнай. ИкI, спортдин и жуьредай ам Вирироссиядин хейлин турниррин гъалибчи я. Ибурулай гъейри, ада каратэдайни Россиядин са жерге турнирра кIвенкIвечи чкаяр кьуна.
Эльдар Мурадханович “Гъилералди кукIунай отличник”, “Спортда виниз тир агалкьунар къазанмишунай” медалрин сагьиб ва кьилин категориядин тренер я. Алай вахтунда ада каратэдай ва гъилералди кукIунай акьалтзавай несилдиз вердишвилер гузва.
Эльдар Рагьимхановахъ 4 велед ава. ЧIехи рухваяр тир Мансур ва Амирни бубадин гелерай фенва, абур кьведни ХМАО-Юградин кьве сеферда чемпионар я.
Къуй хъсан чешне къалурзавай бубадихъни, рухвайрихъни спортда, гьакI уьмуьрда мадни еке агалкьунар хьурай!
«Лезги газет»
