Гьажимурад Темирханован — 105 йис
Цмурар. И хуьруьн тIвар кьурла, чи рикIел анай акъатай машгьур инсанар къведа. Абурун арада Социализмдин Зегьметдин Игит Гьажимурад Темирханова кьетIен чка кьазва.
Лугьудайвал, игитрин тIварар, крар гьамиша халкьдин мецел жеда. ТIвар халкьдин мецел аламай кьван инсандин руьгьни сагъ яз акмукьда.
Вичин бине Цмуррин хуьряй тир Темирханов Гьажимурад 1918-йисуз нафтIадин буругъчидин хизанда дидедиз хьана. ЦIемуьжуьд йис тамам хьайила, ам буругъар ядай «Сталин-нефть» трестдин «Ширваннефть» управленида фялевиле кIвалахал акъвазна. Алакьунар, бажарагъ авай жегьил зирингдиз виликди фена.
КIвалахзавай кьве йисалай адакай буругъ эгъуьндайдан (бурильщик) куьмекчи, 1938-йисан сифте кьилерай буругъчи хьана.
Гьа и йисуз Гь.А.Темирханов Советрин Армиядин жергейриз тухвана. Ватандин ЧIехи дяведин фронтра Гьажимурада вич мягькем ватанперес яз къалурна. Адан кьегьалвилер Ватандин дяведин 1, 2 ва 3-дережайрин орденралди, «Жуьрэтлувиляй», «Кенигсберг кьунай», «Германияда гъалиб хьунай» медалралди ва маса шабагьралди къейдна. Рига, Шауляй, Хайлигенбайль, Мельзень, Вармудитт шегьерар кьунвай душмандин сенгерар кукIварунин женгера къалурай викIегьвилерай Гьажимурад Алимурадовичаз Верховный Главнокомандующий И.В.Сталинан тIварцIихъай чухсагъулдин чарар хтанай.
Дяве куьтягь хьайила, (1946-йисуз) Гь.Темирханов вичи кIвалахай управленидиз хтана, буругъчивилин кIвалах давамар хъувуна.
Дяведин йисара гуьнгуьнай акъатнавай промышленностдин карханаяр, хуьруьн майишат, душманди харапIайриз элкъуьрнавай шегьерар, хуьрер кIвачел ахкьалдар хъувун патал «чIулав къизилдихъ» еке игьтияж авай. Нафт хкудунин кардиз кьвед лагьай фронт лугьузвай. Дяведи ирид йисуз нафтIадин буругърин кIвалахдикай къерех хьуниз мажбур авур Гьажимурад Алимурадович пешекарвилин рекьяй вичин чирвилер девирдин истемишунрин дережадиз хкажун патал чалишмиш хьана. Ада буругъар ягъунин рекьяй машгьур устадар тир, кьве сеферда Сталинан премиядин сагьиб хьайи Агъанейматуладивай, Социализмдин Зегьметдин Игит Рустам Рустамовавай, Николай Трегубовавай, Андрей Тараскинавай чирвилер, тежриба къачуна.
РикIе къаст туна зегьмет чIугур лезги хва вичи тарсар къачур муаллимрилай, вич вердишарай устадрилай вилик фена. Адан гьакъисагъ зегьмет, агалкьунар акур трестдин кьиле авайбуру Гь. Темирханов буругъдин устIарвиле (мастервиле) тайинарна. Гила ада буругъчийриз, вич хьтин устIарриз буругъар ягъунин кIвалахда цIийи къайдаяр ишлемишунин сирер чириз хьана.
Темирханов нафтIадин буругъар эгъуьнунин карда гзаф цIийивилер кардик кутур ксарикай сад я. Адан бригадади, зегьметдин бегьерлувал йисалай-суз хкаж хьун къазанмишиз, залан кIвалах ятIани, планар артухни алаз тамамариз хьана.
1953-йисуз бригадади гуьгъуьнин йисан гьисабдай 4 агъзур метрдин буругъ ягъуналди, 620 агъзур манат кьенят авуна. И йисан нетижайрай ВЦСПС-ди ва нафтIадин промышленностдин министерстводи устIар Гь.Темирханован бригададиз 2-чка ва 15 агъзур манатдин кьадарда аваз пулдин премия ганай. Ам нафтIадин ва газдин промышленность вилик тухунин карда къазанмишай зурба агалкьунрай СССР-дин Верховный Советдин Президиумдин къарардалди, 1959-йисуз Ленинан ордендиз ва къизилдин гъедни галаз Социализмдин Зегьметдин Игитдин тIварцIиз лайихлу хьана. Ам СССР-дин Верховный Советдин Президиумдин ва Азербайжан ССР-дин Верховный Советдин Президиумдин, ВЦСПС-дин, АСПС-дин, СССР-дин ва Азербайжандин нафтIадин промышленностдин министерствойрин гьуьрметдин грамотайрин, «Азербайжан ССР-дин нафтIадин устIар» гьуьрметдин тIварцIин сагьиб тир.
Эхиримжи йисара Гь.Темирханов Кьасумхуьрел яшамиш хьана. 1993-йисан 19-июлдиз регьметдиз фена. Хуьре фаракъатнава.
Игит лезги хцин баркаллу крар, адан гуьзел къамат рикIел хкиз, чна адан руьгьдиз икрамзава.
Хазран Кьасумов
