9-июлдиз ухулвийри чпин чIехи бубайрин Ватанда Хуьруьн югъ къейдна. Абуруз и шад вакъиа мубаракиз атанвай мугьманрин арада Ахцегь райондин кьил Абдул-Керим Палчаевни авай.
Ухулрин хуьр икьван чIавалди Ахцегь райондин гадарнавай, касни яшамиш тежезвай хуьрерин сиягьда авай. Амма са шумуд йис идалай вилик ухулвийрин са десте чпин хуьрел чан хкунив эгечIна. И месэладин патахъай абуру метлеб авай серенжемар кьабулна: гьукумдин органрихъ галаз гуьруьшар тешкилна, государстводин программайра иштиракна, чпин къуватралди хуьруьз хъфизвай рехъ туькIуьриз эгечIна. Са гафуналди, абуру виридаз харапIайриз элкъвенвай хуьруьз кьвед лагьай нефес хгунин жигьетдай вижевай чешне къалурна.
Хуьруьн йикъаз талукьарнавай мярекатдин сергьятра аваз, Абдул-Керим Палчаева чкадин агьалийрихъ галаз са жерге месэлаяр веревирдна. Ухулвийри муниципалитетдин кьиливай рехъ туькIуьрунин ва хуьруьз электричество тухунин патахъай куьмек тIалабна. Абурун гафаралди, цIийи кIвалер эцигун патал сифте нубатда и кьве месэла чарасуз гьялна кIанзава. Идалай гъейри, абуру тагъдин муьгъни, булахни цIийикIа туькIуьр хъувунин игьтияж авайди къейдна.
Лагьана кIанда, «Возрождение» фондунин такьатрихъ ухулвийри хуьруьз хъфизвай рекьин 8 километр мензил къайдадиз хканва, амма рехъ тамамдиз ремонт авуна куьтягьна кIанзава. Мадни, фондунин такьатрихъ хуьре мискIинни цIийикIа туькIуьр хъийидайвал я.
Абдул-Керим Палчаева тIвар кьунвай месэлаяр гьялун патал «Дагавтодор» ва «Россети» карханайриз чарар рекье твадайди хиве кьуна. Тагъдин муьгъни булах цIийикIа туькIуьр хъувуниз акъатзавай харжар райондин кьили вичин хивез къачуна.
Ада гьакIни «Кьурукал-Ухул» рехъ цIийикIа туькIуьр хъийиз гатIуннавайдакайни хабар гана.
Агьмед Магьмудов
