2013-йисалай башламишна, Россияда коммунальный къуллугърай гузвай гьакъидин тарифар йиса са сеферда – 1-июлдилай хкажун адет хьанва. Идалди инфляциядин нетижада пул къуватдай аватунин гьерекатдиз дурум гуз, яшайиш патал иллаки важиблу къурулушрин кIвалах атIунар авачиз кьиле фин таъминариз алахъзава. 2019-йисуз тарифар кьве сеферда хкажна. А чIавуз ам НДС-дин ставка 18 -далай 20 процентдал кьван хкажунихъ галаз алакъалу тир. ИкI, 2019-йисан январдилай тарифар 1,7%, 1-июлдилай 2,4 процентдин виниз фена.
И къайдада нубатдин сеферда дегишвал алатай йисуз хьана – Гьукуматдин къарардалди тарифрин индексация 2023-йисан июлдилай 2022-йисан декабрдал хкана. И сеферда ам са жерге себебралди пулунин къимет агъуз аватунихъ ва, талукь яз, шейэрин къиметар хкаж хьунихъ галаз алакъалу тир. Индексация авун чимивилелди, целди таъминарзавай системаяр цIийи хъувун патал и кар чарасуз тир. Гьа икI, 2022-йисан 1-декабрдилай уьлкведа ЖКХ-дин тарифрин къиметар хкажна – гьар жуьре регионра гьар жуьре кьадарда. Дагъустанда электроэнергия — 8,5 процентдин (1 киловатт – 3 манатни 23 кепек), газ 4,8 поцентдин (1 кубометр – 6 манатни 56 кепек) багьа хьана. Амай къуллугърин къиметарни «цIийи» хъувуна.
РФ-дин Гьукуматди инанмишарайвал, идалай кьулухъ тарифрин къиметар анжах са йисалай – 2024-йисан 1-июлдилай хкажда. И кардал федеральный монополийриз акси къуллугъди (ФАС) гуьзчивал авун лазим я.
Гьа са вахтунда, июлдин варз алукьайвалди, республикада, гуя къиметар дегиш хьун лазим я лугьуз, коммунальный къуллугърай агьалийривай гьакъи къачун тийизвай дуьшуьшар пайда хьанва.
РД-дин энергетикадин ва тарифрин министерстводи хабар гузвайвал, и гафар дуьзбур туш, абуру гьакъикъи гьалариз жаваб гузвач. Идаради инанмишарзава: 2024-йисан 1-июлдалди къуллугърин къиметар авайвал амукьда.
Жасмина Саидова
