(Эвел — 23-24-нумрайра)
- Ада лагьана: “Я Адам! Хабар це абуруз абурун тIварарикай”. Ва Адама абуруз абурун тIварарикай хабар гайила, Ада лагьана: “Бес, За квез, гьакъикъатда, Заз цаварин ва чилин гъайб (чуьнуьх тир крар) чизва лагьаначирни, ва Заз чизва куьне ачухдиз ийизвай крарни ва куьне чуьнуьх (чинеба) ийизвай крарни?!”.
- Ва (рикIел гъваш вуна инсанрин, эй Пайгъамбар) Чна малаикриз лагьай вахт: “Сажда (икрам) ая куьне Адамаз!”. Ва (гьасятда вирида) абуру сажда авуна, са иблисдилай гъейри, ада (сажда) авунач ва такабурлувална, ва (ам) кафиррикай (асивал авурбурукай) хьана.
- Ва Чна лагьана: “Я Адам! Яшамиш жез ацукь вун ва ви паб и Женнетда, ва неъ куьне кьведани анай (емишар, хуш тIуьнар) булдиз ва нушдиз квез гьинай кIандатIани (ана), ва мукьув жемир куьн (кьвед) и тарцив, тахьайтIа (эгер куьне а тарцив кягъайтIа) куьн кьведни зулум авурбурукай жеда”.
- Ва шейтIанди абур кьведни “татаб (ва я цIуьдгъуьн)” жедайвал авуна адан патахъай (абуру хата ийидайвал авуна ва а тарцелай нез туна) ва абур кьведни чеб авай чкадай (ва я хъсан гьалдай) акъудна. Ва Чна лагьана (абуруз): “ЭвичI куьн (чилел), куьн сад садаз душманар я (Адамни Гьава ва шейтIан)! Ва квез чил — “яшамиш жез акъваздай чка” ва “(ана) няметрикай менфят къачун” жеда — та (тайин тир) вахтуналди (Къияматдин Йикъалди).
- Ва кьабулна (къаршиламишна) Адама вичин Раббидин патай (хийирдин, яни туба, астагъфир авунин) келимаяр, ва Ада адан туба кьабулна. Гьакъикъатда, Ам — Туба Гзаф Кьабулдайди, Регьимлуди я, эхир!
- Чна (Аллагьди) лагьана: “ЭвичI куьн (чилел) инай (Женнетдай) вири! Ва эгер квез Зи патай “дуьз рекьин регьбер” атайтIа — (бес), вуж табий хьайитIа, Зи “дуьз рекьин регьбердиз”, жедач абуруз я кичIевал ва жедач абур пашманни.
- Ва чпи, Чи аятрихъ (делилрихъ) кафирвал авуна ва таб яз кьурбур — Жегьеннемдин “сагьибар” жеда, абур ана гьамишалугъ яз амукьда”.
40.Эй, Исраилан рухваяр (Йакъуб пайгъамбардин несилар)! РикIел гъваш куьне За квез багъишай Зи (гзаф кьадар) няметар. Ва кьилиз акъуда куьне тамамвилелди Зи агьт (За квевай къачур икьрар куьне Зи вири расулрихъ, Ктабрихъ иман гъида лагьай). За квез гайи икьрар (и дуьньяда регьим авун ва Эхиратда къутармишун) тамамвилелди кьилиз акъудда ва са Закай квез къурху хьухь!
- Ва иман гъваш куьне (эй, Исраилан рухваяр) За (авудна) ракъурнавайдахъ (Къуръандихъ), квев гвайди (Тавратдиз) тестикьарун яз, ва жемир куьн адахъ эвелимжи кафирвал авурбур (Ктаб-эгьлийрикай). Ва Зи аятар усал къиметрихъ (дуьньядин фана няметрихъ) дегишмир куьне, ва са Захъай квез кичIе хьухь (Зи эмирар кьилиз акъудиз ва Зи къадагъайрикай яргъа жез)!
- Ва какадармир (куьне За ра-къурнавай) гьахъдик таб (таб гьахъдин суьретда къалуриз) ва чуьнуьх ийимир (чин мийир) куьне гьахъ (Мугьаммад пайгъамбардикай чирвал), квез чиз-чиз (а кар куь Ктабдай).
- Ва (Ислам дин кьабулна) капI ада ая куьне (вичин вахтара ва дуьздиз), ва закат це, ва рукугьзавайбурухъ галаз рукугь ая куьне (рукугь -кпIунал юкь агъузна икрам авун я).
- Бес, куьне инсанриз эмирзавани “хийир крар” авун, куьне куьн рикIелай алуднаваз (куьне квез эмир тийиз чIехи хийир кар авун — Ислам дин кьиле тухун) (вични) куьне Ктаб (Таврат) кIелзавайла?! Бес, кьатIузвачни куь акьулди?!
- Ва куьмек яз къачу куьне (куь гьар са кардиз) сабур ва капI, гьакъикъатда, ам (капI) залан кар я (вирибуруз), са умунлубуруз (Аллагьдиз муьтIуьгъбуруз) квачиз.
- Чпи, якъиндиз инандирмишвалзавай, гьакъикъатда, чеб чпин Раббидихъ галаз гуьруьшмиш жедайди (чеб кьейидалай кьулухъ) ва гьакъикъатда, чеб Адан патав хкведайди (Къияматдин Юкъуз).
- Эй, Исраилан рухваяр! РикIел гъваш (куьне) За квез гайи Зи (гзаф кьадар) няметар ва За квез (куь девирдин амай) алемрин винел артуханвал гайиди (квез гзаф пайгъамбарар ва Ктабар ракъурна).
- Ва кичIе хьухь (квез) а Йикъахъай — са чандивай (масадан) чандин патахъай са шейни эвез ийиз тежедай (са касдивайни маса касдиз гьич са куьнинни куьмекни гуз жедач), ва адавай шафаатни (килиг: 4-сура 85-аят) кьабул тийидай, ва адавай (жазадикай азад авунин) барабар гьакъини къачун тийидай, ва абуруз са куьмекни гун тийидай!
- Ва (рикIел гъваш куьне гьакIни) Чна куьн фиръавандин жемятдикай (адан терефдаррин, къаравушрин дестедикай) къутармишай вахт — (абуру) квев пис азабар чIугваз тазвай, куь рухваяр рекьиз ва куь дишегьлияр чан аламаз таз (чпиз лукIвализ, къуллугъиз). Ва а карда квез куь Раббидин патай чIехи имтигьан авай (ва куьн къутармишунин карда чIехи нямет ава квез).
- Ва (рикIел гъваш куьне гьакIни) Чна куьн патал (куьн гьахьдайла) гьуьл пай авур вахт, ва Чна куьн къутармишна ва фиръавандин тухум (жемят) Чна батмишарна, куьнни килигиз.
- Ва (рикIел гъваш куьне гьакIни) Чна Мусадиз яхцIур йифен муддат тайинарай вахт (адан гуьгъуьнай Чна адаз Таврат ракъурдайвал Дуьз рекьин регьбервал яз Исраилан несилриз), ва адалай (Муса фейидалай) кьулухъ куьне (квез къизилдин) дана (гъуц яз) кьуна, куьн зулумкарар яз.
- Ахпа Чна квелай гъил къачунай адалай (а зурба гунагь авай кардилай) кьулухъ, белки, куьне шукур гъин!
- Ва (рикIел гъваш куьне гьакIни) Чна Мусадиз Ктаб (Таврат) ва фаркь ийидайди (гьахъ ва таб чара ийидай делил) багъишай вахт, куьн дуьз рекьел атун патал!
- Ва (рикIел гъваш куьне гьакIни) Мусади вичин халкьдиз лагьай вахт: “Эй, зи халкь! Куьне (къизилдин) дана (гъуц яз) кьуналди (куьне) квез зулум авуна, туба ая куьне куь Халикьдиз ва куьне куьн яна йикь (данадиз ибадат тавурбуру — авурбур), ам — квез хъсан я куь Халикьдин вилик”. (Абуру а кар кьилиз акъудна) ва Ада куь туба кьабулна. Гьакъикъатда, (са) Ам я — туба гзаф Кьабулдайди, Регьимлуди!
(КьатI ама)
Таржума авурди — Ямин Мегьамедов,
диндин рекьяй алим
