И йикъара зун лезги чIалал акъуднавай пак Къуръандин ктаб акурла тажуб хьана. Ам таржума авурди вичин ери-бине Ахцегь райондин Луткунрин хуьряй тир Ямен Амрагьов я. Ислам диндикай, чун элкъуьрна кьунвай чан алай ва алачир шейэррик тамам делилар авай им анжах са чешме. Араб чIалал ам кIелиз чир хьун, адан аятрин, сурайрин манадин гъавурда гьатун им еке бахт я.
Малум тирвал, Къуръан ва маса динриз талукь пак ктабар дуньядин гзаф чIалариз таржума ийизва. Критикри таржумайрин кьетIенвилер, лайихлувилер къейдзава. Са шакни алачиз Ямена авунвай таржумайрин гьакъиндайни талукь тир пешекарри, диндин алимри чпин фикирар лугьуда.
Амрагьан хва Ямена гъвечIи чIавалай сифте вичин чIехи буба Гьашумавай, ахпа маса ксаривайни Исламдин чирвилер къачуз, араб чIал чириз хьана. Мектебдилай гуьгъуьниз Ямена Махачкъалада ирид йисуз аш-Шафиидин тIварунихъ галай Исламдин университет виниз тир чирвилер къачуналди кIелна. Гуьгъуьнлай ам Медина шегьерда авай Исламдин международный университет вири вадар аваз акьалтIарай сифте дагъустанви я. Ада Махачкъалада са мискIиндин имамвални авуна, вичи кIелай вузда муаллимни хьана.
Къейд ийин, пак Къуръандин и таржумадиз РАН-дин востоковеденидин институтдин экспетри чпин заключенини ганва, РФ-дин мусурманрин Духовный управленидин, Россиядин муфтийрин Советдин председатель муфтий шейх Равиль Гайнутдинан патайни разивилин чар ракъурнава, абур ктабда чапнава. Лезги чIалал акъуднавай пак и Ктабдихъ 4 редактор (Я.А. Мегьамедов, Гь.М. Мегьамедов, З.А. Рашидов, А.М. Къардашов) ва 2 (Я.А. Мегьамедов, З.М. Муратханов) корректор ава.
КIанибурувай пак тир и Калам Махачкъала шегьерда Малыгинан тIварунихъ галай куьчеда авайй мискIиндин къаншарда, «Умма» туьквендай маса къачуз жеда. Тел.: 8(960) 447-66-66.
Чи корр.
