6-августдиз Кьурагьа вад лагьай сеферда “Кьурагьрин къугъунар” лишандик кваз спортдин са шумуд жуьредай республикадин дережада аваз акъажунар кьиле фена.
“Лезги газетдиз” муниципалитетдин администрациядин пресс-къуллугъди хабар гайивал, турнирда Дагъустандин жуьреба-жуьре районрайни шегьеррай атанвай 270 спортсменди иштиракна. Абуру чIемерукдай хьелер ахъаюнай, путар хкажунай, штанга хкажунай, ченеяр хкIурунай, армрестлингдай, залан затIар гваз 50 метрдиз катунай ва цIил ялунай чпин алакьунарни къуватар ахтармишна.
Акъажунрин тешкилатчийрин арада Кьурагь райондин администрациядин физкультурадин, спортдин ва жегьилрин крарин рекьяй отдел, РД-дин Муфтият ва мергьяматлувилин “ЛЕКИ” фонд авай.
Турнирда иштиракай командайрин арада Кьурагь, Ахцегь, Дербент, Докъузпара, Леваши, Мегьарамдхуьруьн, СтIал Сулейманан, Хив районрин, Махачкъала, Каспийск, Дербент, Избербаш, Дагъустандин Огни шегьеррин командаяр авай.
Нетижада турнирдин кубокдиз Кьурагь райондин команда лайихлу хьана. Кьурагьвийри акъажунрин пуд жуьредай 1-чкаяр кьунвай. Кьилди къачуртIа, залан затIар гваз катунай — Мегьамедвели Халикьов (Кьурагь), штанга хкажунай — Гьажимурад Мегьамедов (Кьурагь), путар хкажунай — Эдик Агьмедов (Кьасумхуьр), армрестлингдай — Мегьамедвели Халикьов (Кьурагь), чIемерукдай хьелер ахъаюнай — Мурад Рамазанов (Мегьарамдхуьр), ченеяр хкIурунай — Замир Исаев (Хив), цIил ялунай Мегьарамдхуьруьн команда гъалиб хьана.
Гъалибчийризни кIвенкIвечи чкаяр кьурбуруз медалар, грамотаяр ва пулдинни спортдин пишкешар гана. Акъажунрин иштиракчийриз эхирдай суфраярни ахъайнавай.
Агьмед Магьмудов
