Россияда августдин вацра налогриз, карчийриз куьмек гуниз, яракьар ишлемишуниз ва маса хилериз талукь са жерге дегишвилер, цIийи къанунар къуватда гьатда.
Спортдал машгъул жезвайбуруз талукь яз. Спортдал машгъул жезвай россиявийривай 1-августдилай чпи и рекьиз харжзавай такьатрин 13 процент элкъвена вахчуз жеда. Алатай йисуз кьабулнавай и къанундикай алай йисан 1-январдилай налогар гайибуруз менфят къачудай мумкинвал ава. Къейдзавайвал, налогдин эвез вахкун физкультурадизни спортдиз йисан къене харжай 120 агъзур манатдилай артух тушир кьадардиз талукь жеда. ИкI, спортдал машгъул жезвай касдивай йисан къене вини кьил 15 агъзурни 6 виш манат пул вахчуз жеда. ШартI ам я хьи, спортдин тешкилат ва я кьилдин кас махсус сиягьдик хьун чарасуз я.
Жува-жув кIвалахал машгъулзавайбуруз талукь яз. Талукь тир федеральный къанун къуватда гьатайдалай кьулухъ, 1-августдилай, вич вичиз кIвалахал машгъул жезвай агьалийривай госкъуллугърин сайтда регистрация кьилиз акъудиз жеда. Вич вичиз кIвалахал машгъул жезвайвилин дережа гунин ва я тагунин жаваб агьалидин кьилдин кабинетдиз хкведа.
Яракь ишлемишуниз, хуьниз талукь яз. 25-августдилай “Яракьрин гьакъиндай” федеральный къанундик кухтунвай са жерге дегишвилер къуватда гьатда. Кьилди къачуртIа, къанунди гуьлле алай яракь маса къачун патал ватандашдихъ вуч себебар, делилар аватIа, кьетIендаказ тестикьарда. Документди гражданвилин ва къуллугъдин яракь лицензия авай юридический идарайриз ремонт авунин ихтияр гузва. Яракь Росгвардияди гайи направленидин бинедаллаз ремонтдиз вугуз жеда.
Ракьун рекьин къуллугъчийрин мажибриз талукь яз. 1-августдилай “Россиядин ракьун рекьер” тешкилатди вичин къуллугъчийрин мажибрин кьадар 5 процентдин артухар хъийизва. РЖД-дин пресс-къуллугъди тестикьарнавайвал, зегьметдин гьакъи артухар хъувун уьлкведин экономикадин гьаларихъ галаз алакъалу я.
Ихтияр авачиз улакь гьалуниз талукь яз. Эгер ихтиярар гузвай документдикай (право) магьрумнавай касди машин гьалзавай дуьшуьш дуьздал акъатайтIа, ам 50 агъзур манатдилай 100 агъзурдал кьван жерме ийида ва я 150-200 сятда кIвалах авуниз мажбурда.
Ипотекадиз талукь яз. Гзаф аялар авай хизанриз ипотекадин жигьетдай куьмек гуниз талукь программадин муддат 2023-йисан эхирдалди къуватда амукьдайвал артухар хъувунва. Пуд ва адалай гзаф аялар авай хизанривай ипотекадин бурж вахкун патал гьукуматдин патай 450 агъзур манат куьмекдин такьатар къачуз жеда. Ихтилат яшамиш жедай кIвалер маса къачунвай ипотекадин буржуникай физва.
«Лезги газет»
