Дагъустан Республикада Вирироссиядин физкультурникрин югъ ва Вирироссиядин Олимпиададин югъ къейд авунин сергьятра аваз Кьурагь районда спортдин кьве мярекат кьиле тухвана.
ИкI, 8-августдиз Кьурагьа хуьруьн стадиондал жегьилрин арада спортдин милли жуьрейрай акъажунар тешкилна. Абур ачухуниз талукьарнавай шад мярекатдал райондин физический культурадинни спортдин ва жегьилрин крарин рекьяй отделдин начальник Рамиз Рамазанова виридаз спортдин сувар тебрикна, тамам 5 вацра карантинда хьайидалай кьулухъ спортдин мярекатрив эгечI хъувун иллаки шад жедай кар тирди къейдна.
Акъажунра 150-далай виниз жегьилри иштиракна. Абур спортдин милли 6 жуьредай (къван гадарунай, заланвал хкажунай, турникдал чене акъудунай, 2 км-диз чукурунай, къаткана, штанга хкажунай (жим лежа) ва канат ялунай кьиле тухвана. Спортдин и мярекатда гъалиб хьайибуруз медалар, грамотаяр, пулдин ва спортдал машгъул хьунихъ галаз алакъалу пишкешар гана.
9-августдиз лагьайтIа, Кьурагь райондин администрациядин физический культурадинни спортдин ва жегьилрин крарин рекьяй отделди Кьурагь райондин вини патан зонадин жегьилрин арада волейболдай турнир кьиле тухвана. Гелхенрин СОШ-дин спортзалда тешкилай и акъажунрин макьсад неинки спортдин и жуьре районда вилик тухун, гьакIни спортсменрин арада къени адетар ва дуствилин алакъаяр мягькемарун тир. Турнирда Гелхенрин хуьруьн жегьилрин команда -1, Куквазрин ва Шимихуьруьн жегьилрин командаяр, талукь тирвал, 2 ва 3-чкайриз лайихлу хьана.
Гъалибчийрив пишкешар райондин администрациядин отделрин начальникар тир Рамиз Рамазанова ва Рамазан Катибова вахкана. Турнирдин багьа мугьманрин ва иштиракчийрин арада РФ-дин лайихлу духтур, азаддаказ ва грекринни римлуйрин жуьреда кьуршахар кьунай спортдин мастер, алай вахтунда Москвада яшамиш жезвай Камалдинов Керим Мегьамедовични авай.
Волейболдай турнирда гъалиб хьайибурувни медалар, грамотаяр, пишкешар вахкана. Турнирдин тешкилатчийри виридалайни хъсандиз къугъвайбурни кьилдин пишкешар гуналди къейдна. Турнир гьар йисуз кьиле тухун къарардиз къачунва.
«Лезги газет»
