Москвада, Абдулманап Нурмегьамедован къамат рикIел хуьниз бахшна, кьиле тухудай турнирда Мухаммед Эминова ярумчух кьезил заланвиляй чемпионвилин чIул хуьн патал бягьс тухуда.
РикIел хкин, Fight Night Global-ди (какахьай единоборствойрай бягьсер кьиле тухудай международный организация) GFC организациядихъ галаз санал 9-сентябрдиз, тренер А.Нурмегьамедован экуь къамат рикIел хуьнин лишан яз, турнир кьиле тухуда.
М.Эминовахъ галаз Агьмед Балкизова вичин къуватар ахтармишда. А.Балкизова ММА-дай 12 бягьс кьиле тухвана, абурукай 9-да гъалибвал къазанмишна, кьведа кумукьна, са бягьс садан хийирдизни хьанач. Чи ватандашди лагьайтIа, ММА-дай 10 бягьс кьиле тухвана, анжах са сеферда кумукьна, амайбура гъалибвилер къазанмишна.
Чи мухбир
