Буйнакск шегьердай тир Мурад Зиявутдинов велосипеддаллаз Буйнакскдай Симферополдиз фена ва анайни элкъвена Буйнакскдиз хтана. Идакай “Лезги газетдиз” Буйнакскдин администрациядин пресс-къуллугъди хабар гана.
Санлай къачурла, и маршрутди кьазвай 2 700 км мензил М.Зияутдинова 31 юкъуз атIана. Рекье къайда чIурдай крар, шулугъар хьанач. Велосипеддаллаз финал рикI алай касдин гафарай малум хьайивал, икьван гагьди ада ихьтин марафонра иштиракнач.
— Зун са шумудра велосипеддаллаз Махачкъаладиз фена ва элкъвена хтана. Амма икьван яргъал вахтунда сиягьат авуникай гьич хиялни авуначир. Маршрут хкядайвал хьайила, за яргъалди фикирначир, гьелбетда, — Крым, — суьгьбетзава М.Зиявутдинова.
И мукьвара Буйнакск шегьердин кьил Исламудин Нургудаев Мурад Зиявутдиновахъ галаз гуьруьшмиш хьана. Мэрди хиве кьурвал, ада, Интернетдикай менфят къачуналди, вичин ватандашдин маршрут вилив хуьзвай.
— Гьелбетда, Мурадан патахъай чи рикIерик секинсузвал квай. ГьикI хьи, ихьтин серенжем кьилиз акъудун патал неинки кIеви къаст, гьакI физический жигьетдай викIегьвал, жуьрэтлувал хьунни герек я. Мурада жегьилриз, сагълам уьмуьр кьиле тухузвай ксариз хъсан чешне къалурна. Ада игитвилиз уьмуьрда гьамиша чка авайди мад сеферда субутна, — лагьана Исламудин Нургудаева.
Буйнакскдин мэрди М.Зиявутдиновавай рекье гьихьтин четинвилер гьалтнатIа, чи уьлкведин жуьреба-жуьре регионрин агьалийри ам гьикI къаршиламишнатIа, яргъалди хабарар кьуна. Эхирдай адав чухсагъул малумарнавай Чар вугана, гележегда мадни еке агалкьунар хьун алхишна.
Вичин нубатдай яз, велосипедрал рикI алай жегьилди гуьруьш тешкилунай, вичин сиягьатдиз итиж авунай мэрдиз сагърай лагьана.
Чи мухбир
