И йикъара Дагъустандин культурадин министр Зарема Бутаева Кьурагь райондиз мугьман хьана. «Культура» милли проектдин сергьятра аваз Кьурагьа культурадин цIийи хъувунвай кIвале (гила ана ацукьдай 280 чка, артистриз кьилдин кIвал гри­мерный ава) Россиядин халкьарин адетдин культурадин центр кардик ква. Ана кьурагьвийрин яшайиш­дин вишелай виниз шейэр кIватIнава. Культурадин и маканда «халкьдинбур» тир яратмишунардай кьве коллектив — «Кьурагь дагълар» — хор ва театр кардик ква.

Зарема Бутаевади чкадин артистри республикадин конкурсра иштиракзавайди, абурукай лауреатар жезвайди къейдна. Мукьвара Дагъустан Республикадин Гьукуматдин премия патал кьиле тухвай «Дагъустандин руьгь» кон­курс­да «Халкьдин театр» номинацияда Кевсер Фейзуллаева гъалиб хьайиди рикIел хкана.

Министр таниш хьайи культу­радин идарайрин арада аялрин­ искусствойрин школани (ДШИ) ава. Анин регьбер Инаят­ Османовади, кьадайвал туь­кIуьр­навай (прис­пособленный) кIвале­­ра аваз хьунизни килиг тавуна,­ школада­ пешекарвилин сирер чириз кIан­завай аялрин кьадар тIимил туширди раижна (алай вахтунда ина 35 му­ал­лимди кIвалахзава, 300-далай виниз аял­ри чирвилер къачузва, адан филиалар КьепIирдал, КIирида, Штула, Моллакентда ва Хпежа кардик ква). З.Бутаевадиз гъвечIи устадри туькIуьрнавай шейэрни (поделки) къалурна.

З.Бутаева райондин культурадин са жер­ге идарайриз фена. Къенин юкъуз муниципалитетда 20 библиотека кардик ква, виридаз капремонт герекзава. Эхиримжи 2 йисуз федеральный субсидийрин такьатрин гьисабдай анрив 1000-далай виниз цIийи ктабар агакьна. Министрди кьве биб­лиотекадиз Р.Гьамзатован 100  йисан юбилейдиз талукь гуьрчег изданияр пишкешна. Ада, кIва­лахдин регьят  тушир шартIа­ризни килиг тавуна, анра гьакъисагъвилелди зегьмет чIугвазвай къуллугъчийриз  сагърай лагьана.

Министрди Кьурагьрин тарих­динни край чирдай музейдал — А.Тахо-Годидин тIва­рунихъ галай­ Милли музейдин филиалдални­ кьил чIугуна. Ана яшайишдиз талукь шейэр, зегьметдин алатар, 18-асирдин эхирдин —  19-асирдин­ сифте кьилерин милли партал­ хуьзва. Женгинин баркалладин­ залда Ватандин ЧIехи дяведин­ иш­тиракчийрин шикилрин стен­дар­, грамотаяр, медалар, куьгьне пулар, СССР-дин вахтарин техника­дин бязи затIар хуьзва.  Министр­ди кьилин музейдин регьбердал филиалдин тереф хуьн, экспедиция ва музейдин тадаракар цIийи хъувун тапшурмишна. ГьакIни ватанпересвилин тербия­диз талукь­ стендар хъсанаруникайни лагьана­.

З.Бутаева КIирийрин хуьруьн культурадин кIвализни фена. Куьгьне хьанвай и объектди капремонт истемишзава. Ам реестр­дик кутунва ва 2025-2026-йисара культура вилик тухунин федеральный программада иштиракун патал виликамаз малумарда.

Чи мухбир