3,5 миллиард манат герек я
Салан майваяр хуьдай махсус базаяр эцигунин проектриз гьукуматдин патай куьмек гун патал Дагъустанди уьлкведин хуьруьн майишатдин министерстводиз сифте яз чар рекье тунва. Идакай, республикадин премьер-министр Абдулмуслим Абдулмуслимован гафарал асаслу яз, «Дагъустан» РИА-ди хабар гузва.
РД-дин Гьукуматдин Председателдин гафаралди, санлай къачурла, проектрин къимет 3,5 миллиард манатдиз барабар жеда. Абур кьилиз акъудиз алакьайтIа, республикада 58 агъзур тонндив агакьна суьрсет хуьдай чкаяр тешкилиз жеда.
Ада гьакIни къейд авурвал, алай вахтунда регионда хуьруьн майишатдин 100 агъзур тонндив агакьна суьрсет хуьдай махсус базаяр эцигзава.
Кьадарар тайинарнава
Дагъустанда 2024-йис патал агьалийриз яшамиш хьун патал чарасуз герек такьатрин агъа кIанин кьадар (прожиточный минимум) тайинарнава. Идакай «Дагъустан» РИА-ди хабар гузва.
ИкI, чешмеди къейдзавайвал, алукьзавай йисуз агьалийриз яшамиш хьун патал чарасуз герек такьатрин агъа кIанин кьадарар ихьтинбур я:
— кьилдин гьар са агьали патал (на душу населения) — 14 062 манат;
— зегьметдиз къабил агьалияр патал — 15 328 манат;
— пенсионерар патал — 12 093 манат;
— аялар патал — 13 745 манат.
Дербентдиз яд гъизва
Дербентда, государстводин «СКФО вилик тухун» программадин сергьятра аваз, «Къайтагъ – Дербент» водоводдин чIехи проект акъудунин кIвалахар йигиндаказ кьиле физва.
Къейдзавайвал, вичин гужлувал суткада 24 агъзур кубометрдикай ва яргъивални 30 километрдикай ибарат и объектди къадим шегьер целди таъминарунин кIвалах хейлин хъсанарда.
Алай вахтунда 11,5 километрдин мензилдиз турбаяр тухванва. УстIарри гьакIни «Самур – Дербент» къаналдилай водовод алудунин кIвалахни агалкьунралди кьилиз акъуднава. Къейдзавайвал, им проект кьилиз акъудунин карда важиблу месэлайрикай сад я. КIвалахар тамамдаказ 2026-йисаз мукьва яз акьалтIардайдак умуд кутунва.
Вад йисан нетижаяр
РД-дин премьер-министр А.Абдулмуслимован гафаралди, Дагъустанда здравоохраненидин хиле гьял тавуна амай месэлайрин кьадар тIимил туштIани, къейд авуниз лайихлу агалкьунарни хьанва.
РД-дин Гьукуматдин Председателди, эхиримжи вад йисан къене агьалийрин сагъламвилихъ галаз алакъалу хиле хьанвай дегишвилерин гьакъиндай са бязи рекъемар раижна. ИкI, регионда 127 ФАП кардик кутунва, 14-дав агакьна духтурханаярни амбулаторный поликлиникаяр ишлемишиз вахканва, 2 агъзур уьлчмедилай виниз медицинадин тадаракар къачунва. 33 уьлчмедив агакьна КТ-ярни МРТ-яр, 368 уьлчме санитарный улакьар, «тади куьмекдин» 284 машин маса къачунва.
ГьакIни ТАСС-ди, Абдулмуслимован гафарал асаслу яз хабар гузвайвал, региондин бюджет гьикьван четинвилерал расалмиш жезватIани, 2024-йисуз Дагъустандин гьукуматдин кьилевайбуру РБК-дин (Республиканская клиническая больница) игьтияжриз саки 40 миллион манат чара авун патал алава такьатар жагъурнава.
А.Абдулмуслимова хиве кьурвал, региондин амай духтурханайривни поликлиникайрив гьа и къайдада эгечIиз алахъда, и макьсадри истемишзавай харжияр бюджетдин мумкинвилерин сергьятрилай алатиз хьайитIани.
60 процентдин кьадарда
Республикада вечрен какайрин къиметар къайдадик кутунин макьсаддалди региондин пуд районда къушчивилин фабрикаяр эцигда. Идакай «Кавказ правда» телеграм-каналди хабар гузва.
Чешмеди, РД-дин премьер-министр Абдулмуслим Абдулмуслимован гафарал асаслу яз, къейдзавайвал, цIийи карханаяр Хасавюрт, Къизляр ва Казбек районра арадал гъида.
Чиновникдин гафаралди, 2025-йисан эхирра республикади алава яз 230 миллиондив агакьна вечрен какаяр гьасилда ва идалди регионди вичи вич и суьрсетдалди таъминарунин кьадар 60 процентдив агакьарда.
РикIел хкин, газетдин виликан нумрада чна хабар гайивал, Дагъустанда гьар йисуз тахминан 250 миллион кака гьасилзава. РД-дин хуьруьн майишатдин ва недай суьрсетдин министерстводин делилралди, 2024-йисуз и рекъем 100 миллион кьван артухарун фикирдиз къачунва.
Министерстводин пресс-къуллугъдин делилралди, регионди винидихъ къейднавай суьрсетдихъ авай вичин игьтияж анжах 30 процентдин кьадарда аваз таъминарзава. Санлай къачурла, республикадин игьтияж 800 миллиондиз барабар я. Бес тежезвай какаяр Дагъустандиз Азербайжандайни Урусатдин са жерге регионрай гъизва.
Гьазурайди — Муса Агьмедов
